جموں, 07 مئی (ہ س)۔ جموں و کشمیر اور لداخ ہائی کورٹ کے چیف جسٹس ارون پلی نے ڈسٹرکٹ کورٹ کمپلیکس جموں میں ولنریبل وٹنس ڈپوزیشن سینٹر کا افتتاح کیا۔ اس مرکز کا مقصد بچوں، جنسی جرائم کے متاثرین اور دیگر حساس گواہوں کو عدالت میں محفوظ اور دوستانہ ماحول فراہم کرنا ہے تاکہ وہ بغیر خوف اور ذہنی دباؤ کے اپنا بیان ریکارڈ کرا سکیں۔

اس مرکز میں جدید سہولیات فراہم کی گئی ہیں جن میں علیحدہ انتظار گاہیں، لائیو ویڈیو کانفرنسنگ، ون وے مرر اور بچوں کے لیے موزوں ماحول شامل ہے۔ یہ سہولیات سپریم کورٹ کی ہدایات کے مطابق قائم کی گئی ہیں تاکہ مقدمات کی سماعت کے دوران متاثرین کو دوبارہ ذہنی اذیت کا سامنا نہ کرنا پڑے۔

افتتاحی تقریب سے خطاب کرتے ہوئے چیف جسٹس ارون پلی نے کہا کہ اس مرکز کا قیام عدلیہ کے اس عزم کی عکاسی کرتا ہے کہ کمزور اور حساس گواہوں کے حقوق اور وقار کا تحفظ یقینی بنایا جائے اور انہیں منصفانہ سماعت فراہم کی جائے۔

اس موقع پر ہائی کورٹ کے متعدد جج صاحبان، عدالتی افسران، وکلا اور دیگر معزز شخصیات بھی موجود تھیں۔

ہندوستھان سماچار

---------------

ہندوستان سماچار / محمد اصغر