ممبئی ، 7 مئی (ہ س) مہاراشٹر کے نائب وزیر اعلیٰ ایکناتھ شندے کے ہیلی کاپٹر کو جمعرات کے روز خراب موسمی حالات کے باعث ہنگامی طور پر ممبئی کے جوہو ایئرپورٹ پر اتارنا پڑا۔ یہ واقعہ اُس وقت پیش آیا جب ہیلی کاپٹر کلیان اور مربڈ علاقے کے درمیان شدید گرد آلود طوفان کی زد میں آ گیا تھا۔۔ پائلٹ کی فوری کارروائی اور تکنیکی مہارت کو اس واقعے میں انتہائی اہم قرار دیا جا رہا ہے، کیونکہ اسی کے باعث ممکنہ بڑے فضائی سانحے سے بچاؤ ممکن ہو سکا۔

ذرائع کے مطابق ایکناتھ شندے مہالکشمی ریس کورس سے ہیلی کاپٹر کے ذریعے مربڈ میں منعقدہ ایک شادی تقریب میں شرکت کے لیے روانہ ہوئے تھے۔ دورانِ پرواز کلیان علاقے کے اوپر اچانک شدید دھول بھری آندھی اور تیز ہواؤں نے ہیلی کاپٹر کو اپنی لپیٹ میں لے لیا، جس کے باعث فضا میں حدِ نگاہ کم ہو گئی اور پرواز خطرناک صورتحال اختیار کر گئی۔

حالات کو دیکھتے ہوئے پائلٹ نے غیرمعمولی حاضر دماغی اور پیشہ ورانہ مہارت کا مظاہرہ کرتے ہوئے فوری طور پر مربڈ کی جانب سفر منسوخ کیا اور ہیلی کاپٹر کو واپس ممبئی کی طرف موڑ دیا۔ بعد ازاں جوہو ایئرپورٹ پر کامیاب ایمرجنسی لینڈنگ کی گئی۔

حکام نے بتایا کہ نائب وزیر اعلیٰ ایکناتھ شندے، عملے کے ارکان اور دیگر تمام افراد محفوظ ہیں۔ کسی کو کوئی جسمانی نقصان نہیں پہنچا۔

سرکاری ذرائع کے مطابق کلیان-مربڈ علاقے میں اچانک آنے والے گرد آلود طوفان اور تیز ہواؤں نے چند لمحوں کے لیے سنگین خطرہ پیدا کر دیا تھا۔ حکام کا کہنا ہے کہ اگر بروقت فیصلہ نہ لیا جاتا تو صورتحال زیادہ خطرناک ہو سکتی تھی۔

ہندوستھان سماچار

--------------------

ہندوستان سماچار / جاوید این اے