گوالیار، 06 مئی (ہ س)۔

مدھیہ پردیش کے گوالیار ضلع میں ڈبرا تھانہ علاقہ کے تحت ارو تراہے کے پاس منگل کی رات ایک تیز رفتار کار بے قابو ہو کر بجلی کے کھمبے سے ٹکرا گئی اور اس کے بعد کار میں آگ لگ گئی۔ اس حادثے میں کار سوار دو دوستوں کی زندہ جل کر موت ہو گئی۔

پولیس کے مطابق، حادثہ منگل کی رات تقریباً 2 بجے ڈبرا-گوالیار نیشنل ہائی وے پر پیش آیا۔ یہاں تیز رفتار سوئفٹ کار 11 کے وی بجلی کے کھمبے سے اتنی زور سے ٹکرائی کہ کھمبا ٹوٹ گیا اور بجلی کے تار کار پر گر گئے۔ ٹکر کے بعد کار پلٹ گئی اور اس میں فوراً آگ لگ گئی۔ کار میں شادی کی تقریب سے بچے ہوئے پٹاخے رکھے تھے، جس کی وجہ سے آگ نے تیزی سے شدت اختیار کر لی۔

واقعے کی اطلاع ملتے ہی مقامی لوگ موقع پر پہنچ گئے اور آگ بجھانے کی کوشش کی۔ ساتھ ہی پولیس اور فائر بریگیڈ کو اطلاع دی گئی۔ فائر فائٹرز کی ٹیم نے موقع پر پہنچ کر سخت جدوجہد کے بعد آگ پر قابو پایا، لیکن تب تک کار مکمل طور پر جل کر راکھ ہو چکی تھی۔ پولیس نے دونوں لاشوں کو باہر نکال کر پوسٹ مارٹم کے لیے بھیج دیا ہے۔

پولیس کے مطابق، متوفین کی شناخت چھترپور کے رہائشی اودھیش وشوکرما (32 سال) اور رام جی سونی (33 سال) کے طور پر ہوئی ہے۔ اودھیش فنانسنگ کا کام کرتے تھے۔ شیوپوری کے بامور میں ان کا سسرال ہے۔ اویناش جھا ان کے سالے ہیں۔ گوالیار میں اویناش کے دوست کے یہاں شادی تھی، جس میں شرکت کے لیے وہ چھترپور سے شیوپوری آئے تھے۔

شیوپوری سے اویناش، اودھیش اور رام جی کار میں سوار ہو کر گوالیار گئے تھے۔ واپسی کے وقت انہوں نے شادی کی آتش بازی میں بچے ہوئے پٹاخے کار میں رکھ لیے تھے۔ کار اودھیش چلا رہے تھے۔ خدشہ ظاہر کیا جا رہا ہے کہ اودھیش کو نیند کا جھونکا آیا، جس کے بعد گاڑی بجلی کے پول سے ٹکرا گئی۔ حادثے کے بعد پول بیچ سے ٹوٹ گیا اور 11 کے وی کی لائن گاڑی کے اوپر گر گئی۔ اس کے بعد کار کے آگے کے دونوں دروازے لاک ہو گئے۔ اویناش پیچھے بیٹھے ہوئے تھے۔ ٹکر لگنے سے پیچھے کے دروازے کھل گئے اور اویناش باہر گر گئے۔ اودھیش اور رام جی کار میں ہی پھنس گئے۔ انہوں نے اور وہاں سے گزرنے والے لوگوں نے آگ بجھانے کی کافی کوشش کی، لیکن آگ اتنی ہولناک تھی کہ اس پر قابو نہیں پایا جا سکا۔

ابتدائی تحقیقات میں حادثے کی وجہ تیز رفتاری اور گاڑی پر کنٹرول کھونا بتایا جا رہا ہے۔ پولیس معاملے کی تحقیقات کر رہی ہے اور یہ بھی پتہ لگایا جا رہا ہے کہ حادثے کے وقت کار کی رفتار کتنی تھی۔ پولیس نے شیوپوری میں متوفین کے لواحقین کو مطلع کر دیا ہے اور ان کے ڈبرا پہنچنے کا انتظار کر رہی ہے۔ حادثے میں کار مکمل طور پر جل گئی اور نوجوانوں کے صرف ڈھانچے ہی باقی بچے ہیں۔

ہندوستھان سماچار

---------------

ہندوستان سماچار / انظر حسن