جموں, 04 مئی (ہ س)۔

جموں ڈیولپمنٹ اتھارٹی (جے ڈی اے) نے رنگ روڈ کوریڈور کے ساتھ غیر قانونی تعمیرات کے خلاف ایک بڑی انہدامی مہم چلائی، جس کا مقصد غیر قانونی تعمیرات پر قابو پانا اور منظم شہری ترقی کو یقینی بنانا ہے۔حکام کے مطابق، اس کارروائی کے دوران 15 سے زائد غیر قانونی ڈھانچوں کو مسمار کیا گیا جو مجاز اتھارٹی کی اجازت کے بغیر تعمیر کیے گئے تھے۔ ان تعمیرات کو زمین کے منظور شدہ استعمال اور بلڈنگ قوانین کی کھلی خلاف ورزی قرار دیا گیا۔ابتدائی جائزے میں انکشاف ہوا کہ کئی ڈھانچے عوامی سلامتی کے لیے سنگین خطرہ بن چکے تھے۔ بعض عمارتیں خستہ حال تھیں جبکہ کچھ اہم مقامات پر تجاوزات کی صورت میں قائم تھیں، جس سے قریبی رہائشی اور تجارتی علاقوں کو خطرات لاحق تھے۔

یہ کارروائی جے ڈی اے کے انفورسمنٹ ونگ نے مقامی انتظامیہ اور قانون نافذ کرنے والے اداروں کی مدد سے انجام دی، اور اس دوران کوئی ناخوشگوار واقعہ پیش نہیں آیا۔ حکام نے بتایا کہ کارروائی سے قبل خلاف ورزی کرنے والوں کو نوٹس جاری کیے گئے تھے اور انہیں قانونی تقاضے پورے کرنے کے لیے مناسب وقت بھی دیا گیا تھا۔جموں ڈیولپمنٹ اتھارٹی نے شہر میں منظم ترقی کے عزم کا اعادہ کرتے ہوئے عوام سے اپیل کی ہے کہ وہ تعمیرات سے قبل لازمی اجازت حاصل کریں اور تمام قوانین کی پابندی کریں۔حکام نے خبردار کیا کہ غیر قانونی تعمیرات نہ صرف قانون کی خلاف ورزی ہیں بلکہ عوامی سلامتی کے لیے بھی خطرہ بن سکتی ہیں، اور اس طرح کی کارروائیاں آئندہ بھی بلا امتیاز جاری رہیں گی۔

ہندوستھان سماچار

---------------

ہندوستان سماچار / محمد اصغر