جموں, 30 مئی (ہ س)جموں و کشمیر اور لداخ ہائی کورٹ کے چیف جسٹس ،جسٹس ارون پلی نے ڈسٹرکٹ کورٹ کمپلیکس (ڈی سی سی) جموں میں بچوں کی نگہداشت کے لیے ایک جدید کریچ سہولت کا افتتاح کیا اور نوجوان وکلا کے لیے مجوزہ چیمبرز کی عمارت کا سنگِ بنیاد رکھا۔افتتاحی تقریب میں ہائی کورٹ کے متعدد جج صاحبان، رجسٹرار جنرل موہندر کمار شرما، پرنسپل ڈسٹرکٹ اینڈ سیشنز جج جموں رویندر ناتھ واتل، بار ایسوسی ایشن کے صدر نرمل کشور کوتوال اور دیگر عدالتی افسران و معزز شخصیات نے شرکت کی۔عدالتی کمپلیکس میں قائم کیا گیا کریچ ورکنگ والدین، بالخصوص خواتین وکلا، عدالتی ملازمین اور افسران کے بچوں کی دیکھ بھال کے لیے جدید سہولیات سے آراستہ ہے۔ اس میں تربیت یافتہ عملہ، بچوں کے لیے محفوظ ماحول اور تعلیمی وسائل فراہم کیے گئے ہیں تاکہ والدین اپنی پیشہ ورانہ ذمہ داریوں کو بہتر انداز میں انجام دے سکیں۔

اس موقع پر چیف جسٹس نے نوجوان وکلا کے لیے مجوزہ چیمبرز کا سنگِ بنیاد بھی رکھا۔ یہ منصوبہ ضلعی عدالتوں میں پریکٹس کرنے والے نوجوان وکلا کو پیشہ ورانہ ماحول اور مناسب کام کی جگہ فراہم کرنے کے مقصد سے شروع کیا گیا ہے، جس سے ان کی قانونی خدمات اور پیشہ ورانہ ترقی کو فروغ ملے گا۔تقریب کے اختتام پر ڈسٹرکٹ کورٹ کمپلیکس میں شجرکاری مہم بھی منعقد کی گئی، جس میں جج صاحبان، بار ایسوسی ایشن کے عہدیداران اور دیگر معززین نے پودے لگا کر ماحولیات کے تحفظ کے عزم کا اظہار کیا۔

ہندوستھان سماچار

---------------

ہندوستان سماچار / محمد اصغر