کشن گنج، 30 مئی (ہ س)۔شہر کے مصروف سودا گر پٹی روڈ پر ہفتہ کے روز فلپ کارٹ کا سامان لے کر جارہے ایک کنٹینر ٹرک میں اچانک آگ لگ جانے سے علاقہ میں افرا تفری کا ماحول بن گیا۔

واقعے کے بعد سڑک پر لوگوں کا ہجوم جمع ہوگیا اور ٹریفک عارضی طور پر درہم برہم ہوگئی۔ حالانکہ فائر بریگیڈ نے بروقت پہنچ کر آگ کو پھیلنے سے روک دیا۔ کوئی جانی نقصان نہیں ہوا۔

عینی شاہدین کے مطابق کنٹینر ٹرک سوداگر پٹی روڈ سے گزر رہا تھا کہ گاڑی سے دھواں اٹھتا ہوا دیکھا گیا۔ ڈرائیور اور آس پاس کے لوگوں نے صورتحال کو بھانپتے ہوئے گاڑی سڑک کے کنارے روک دی۔ آگ نے تیزی سے کنٹینر کے ایک حصے کو اپنی زد میں لے لیا جس سے جائے وقوعہ پر خوف و ہراس پھیل گیا۔

مقامی لوگوں نے فوری طور پر پولیس اور فائر بریگیڈ کو اطلاع دی۔ اطلاع ملتے ہی فائر بریگیڈ کی ٹیم جائے وقوعہ پر پہنچی اور آگ بجھانا شروع کردیا۔ کافی کوشش کے بعد فائر عملہ نے آگ پر قابو پالیا اور اسے پورے کنٹینر میں پھیلنے سے روک دیا۔ آگ بجھانے کے دوران سڑک پر ٹریفک میں خلل پڑا۔

پولیس بھی جائے وقوعہ پر پہنچی اور ہجوم کو کنٹرول کرنے اور ہموار ٹریفک کو برقرار رکھنے میںمصروف تھے۔ کنٹینر میں ای کامرس کمپنی فلپ کارٹ کا سامان لدا ہوا تھا۔ سامان کو پہنچنے والے نقصان کا اندازہ لگایا جا رہا ہے۔ حکام کے مطابق آگ لگنے کی اصل وجہ تاحال معلوم نہیں ہو سکی۔

ابتدائی تحقیقات میں شارٹ سرکٹ یا تکنیکی خرابی کا پتہ چلتا ہے حالانکہ سرکاری طور پر اس کی تصدیق نہیں ہو سکی ہے۔

انتظامیہ کا کہنا ہے کہ آگ پر مکمل طور پر قابو پانے اور تحقیقات کا عمل مکمل ہونے کے بعد ہی نقصان کی واضح تصویر اور آگ لگنے کی وجہ معلوم ہوسکے گی۔ فی الحال زخمیوں یا اموات کی کوئی اطلاع نہیں ہے، جس سے عوام کو راحت ملی ہے۔ انتظامیہ نے پورے معاملے کی چھان بین شروع کر دی ہے۔

ہندوستھان سماچار

ہندوستان سماچار / Mohammad Afzal Hassan