نئی دہلی، 29 مئی (ہ س)۔

مرکزی جل شکتی وزیر سی آر پاٹل نے شدید گرمی اور چلچلاتی دھوپ کے درمیان صفائی کے کارکنوں کی حمایت میں عوام کی شرکت پر زور دیتے ہوئے شہریوں سے اپیل کی کہ وہ ان کے تئیں حساسیت، احترام اور تعاون کا مظاہرہ کریں۔ انہوں نے کہا کہ پانی، سایہ، اور احترام جیسے چھوٹے اقدامات بھی صفائی کے کارکنوں کے لیے ایک بہترین معاون ثابت ہو سکتے ہیں۔

مرکزی وزیر پاٹل نے جمعہ کو میڈیا سے بات کرتے ہوئے کہا کہ ملک کے مختلف حصوں میں شدید گرمی کے باوجود صفائی کارکنان گاو¿ں، گلیوں اور عوامی مقامات کو صاف، محفوظ اور صحت مند رکھنے کے لیے انتھک محنت کر رہے ہیں۔ چلچلاتی دھوپ اور مشکل حالات میں بھی ان کی لگن اور خدمت کا جذبہ متاثر کن ہے۔

انہوں نے کہا کہ وزیر اعظم نریندر مودی نے بھی ہم وطنوں سے اپیل کی ہے کہ وہ اس مشکل وقت میں انتہائی حساسیت اور ہمدردی کے ساتھ ایک دوسرے کا خیال رکھیں۔ اس پیغام کو آگے بڑھاتے ہوئے، انہوں نے شہریوں پر زور دیا کہ وہ قریبی صفائی کے کارکنوں کو پینے کا پانی فراہم کریں، انہیں سایہ میں تھوڑی دیر آرام کرنے کی ترغیب دیں، اور ان کے ساتھ احترام کے ساتھ پیش آئیں۔

پاٹل نے کہا کہ صفائی صرف حکومت یا انفرادی کارکنوں کی ذمہ داری نہیں ہے، بلکہ معاشرے کی اجتماعی ذمہ داری ہے۔ سوچھ بھارت مشن (دیہی) نے شہریوں سے صفائی کے کارکنوں کے لیے پانی، سایہ اور انسانی سلوک کو یقینی بنانے کی اپیل بھی کی۔

انہوں نے کہا کہ انسانیت، ہمدردی اور حساسیت کے ساتھ صفائی ستھرائی کے کارکنوں کی حمایت کرتے ہوئے، کوئی بھی ایک صاف، صحت مند اور حساس ہندوستان کی تعمیر میں حصہ لے سکتا ہے۔

ہندوستھان سماچا ر

ہندوستان سماچار / عطاءاللہ