جموں, 29 مئی (ہ س)جموں و کشمیر کے نائب وزیر اعلیٰ سریندر چودھری نے کالی دھار میں زیر تعمیر سنگل ٹنل پروجیکٹ کا دورہ کرکے جاری تعمیراتی کاموں کا جائزہ لیا اور کام کی رفتار و معیار پر اطمینان کا اظہار نہ کرتے ہوئے متعلقہ ایجنسیوں کو سخت ہدایات جاری کیں۔

دورے کے دوران نائب وزیر اعلیٰ نے ناقص معیار، سست رفتاری اور مقررہ اسٹینڈرڈ آپریٹنگ پروسیجرز (ایس او پیز) کی مبینہ خلاف ورزیوں پر سخت برہمی ظاہر کی۔ انہوں نے کہا کہ پروجیکٹ پہلے ہی 2025 کی تکمیل کی ڈیڈ لائن سے پیچھے رہ چکا ہے، لہٰذا کام میں تیزی لائی جائے اور معیار پر کوئی سمجھوتہ نہ کیا جائے۔

انہوں نے متعلقہ حکام اور تعمیراتی ایجنسیوں کو ہدایت دی کہ تمام حفاظتی اقدامات پر مکمل عمل درآمد یقینی بنایا جائے تاکہ حالیہ حادثے جیسے افسوسناک واقعات سے بچا جا سکے، جس میں ایک مزدور کی جان چلی گئی تھی۔

نائب وزیر اعلیٰ نے کہا کہ ٹنل پروجیکٹ کی تکمیل تک عوام کی سہولت کے لیے متبادل سڑکوں کی مناسب دیکھ بھال کی جائے تاکہ ٹریفک کی آمد و رفت بغیر کسی رکاوٹ کے جاری رہے۔

انہوں نے کہا کہ سنگل ٹنل پروجیکٹ راجوری، پونچھ اور جموں کے درمیان رابطہ بہتر بنانے اور خطے کی مجموعی ترقی کے لیے نہایت اہم ہے، جس سے عوام کو بہتر سفری سہولیات میسر آئیں گی۔

اس موقع پر نائب وزیر اعلیٰ نے ماسٹر وید پرکاش اکیڈمی سے لنگر نوشہرہ تک سڑک پر جاری کاموں سمیت علاقے میں دیگر ترقیاتی منصوبوں کا بھی جائزہ لیا۔

ہندوستھان سماچار

---------------

ہندوستان سماچار / محمد اصغر