جموں, 29 مئی (ہ س)اعلیٰ تعلیم کے فروغ اور ادارہ جاتی تعاون کو مضبوط بنانے کے مقصد سے گورنمنٹ ڈگری کالج کاستی گڑھ اور گورنمنٹ ڈگری کالج ڈوڈہ کے درمیان ایک مفاہمتی یادداشت (ایم او یو) پر دستخط کیے گئے۔

اس معاہدے کے تحت دونوں کالج مشترکہ طور پر سیمینار، ورکشاپس، کانفرنسز، گیسٹ لیکچرز، فیکلٹی ایکسچینج پروگرام، تعلیمی دورے، انٹرن شپ اور دیگر تعلیمی سرگرمیوں کا انعقاد کریں گے۔ معاہدے کا مقصد طلبہ کو جدید تعلیمی و پیشہ ورانہ مہارتوں سے آراستہ کرنا تحقیق و اختراع کو فروغ دینا ہے۔

کالج انتظامیہ کے مطابق اس اشتراک سے طلبہ کو بین الشعبہ جاتی تعلیم، تحقیقی سرگرمیوں، ثقافتی پروگراموں اور کمیونٹی سروس میں حصہ لینے کے بہتر مواقع فراہم ہوں گے، جبکہ اساتذہ کے درمیان علمی تبادلہ بھی مضبوط ہوگا۔

دونوں کالجوں کے پرنسپلز نے اس اقدام کو اعلیٰ تعلیم کے شعبے میں ایک اہم پیش رفت قرار دیتے ہوئے کہا کہ اس سے تعلیمی معیار بہتر ہوگا اور طلبہ کے لیے ترقی کے نئے راستے کھلیں گے۔

مفاہمتی یادداشت پر گورنمنٹ ڈگری کالج ڈوڈہ کے پرنسپل ڈاکٹر جاوید اقبال اور گورنمنٹ ڈگری کالج کاستی گڑھ کے پرنسپل پروفیسر کوشل کمار منگوترا نے دستخط کیے۔ اس موقع پر ڈاکٹر سندیپ کوتوال، ڈاکٹر وحید بلوان، ڈاکٹر سمت کوتوال اور پروفیسر انوج کمار سمیت کئی اساتذہ بھی موجود تھے۔

ہندوستھان سماچار

---------------

ہندوستان سماچار / محمد اصغر