جموں, 28 مئی (ہ س)۔ لداخ کے دراس سب ڈویژن کے مراد باغ علاقے میں ایک بھورے ریچھ نے بھیڑوں کے ریوڑ پر حملہ کر دیا، جس کے نتیجے میں کئی بھیڑیں ہلاک اور زخمی ہو گئیں۔ واقعے کے بعد علاقے میں خوف و ہراس پھیل گئی اور مقامی لوگ شدید تشویش میں مبتلا ہو گئے۔مقامی ذرائع کے مطابق ریچھ اچانک آبادی کے قریب پہنچ گیا اور چراگاہ میں موجود بھیڑوں پر حملہ آور ہوا، جس سے مال مویشی پالنے والوں کو کافی مالی نقصان اٹھانا پڑا۔علاقہ مکینوں کا کہنا ہے کہ حالیہ دنوں میں جنگلی جانوروں کی نقل و حرکت آبادی اور چراگاہوں کے نزدیک بڑھ گئی ہے، جس سے انسانی جانوں کو بھی خطرہ لاحق ہو سکتا ہے۔ لوگوں نے محکمہ وائلڈ لائف اور ضلعی انتظامیہ سے مطالبہ کیا ہے کہ فوری اقدامات کر کے جنگلی جانوروں کو آبادی سے دور رکھنے کے لیے مؤثر انتظامات کیے جائیں تاکہ مستقبل میں ایسے واقعات کی روک تھام ممکن ہو سکے۔

ہندوستھان سماچار

---------------

ہندوستان سماچار / محمد اصغر