پٹنہ، 28 مئی (ہ س)۔بہار میں پٹنہ ضلع کے باڑھ تھانہ علاقے میں گنگا ندی میں ایک بڑا حادثہ پیش آیا۔ باڑھ کے اوماناتھ گھاٹ کے قریب ایک چھوٹی کشتی الٹنے سے تین افراد کی موت ہو گئی اور چار دیگر لاپتہ ہیں۔ سات دیگر افراد کو ریسکیو ٹیموں نے بچا لیا۔معلومات کے مطابق باڑھ سب ڈویژن کے اوماناتھ گھاٹ کے قریب بند ٹولی سے 14 لوگ جمعرات کی صبح ایک کشتی پر سوارہوکر سمستی پور ضلع کے سلطان پور دیارہ، محی الدین نگر جانے کے لیے روانہ ہوئے تھے۔ لوگ اکثر لوکی کی کٹائی اور دیگر زرعی سرگرمیوں کے لیے اس علاقے کا دورہ کرتے ہیں۔ واپسی کے دوران سمستی پور کے سلطان پور دیارہ کے قریب تیز ہواؤں کی وجہ سے کشتی الٹ گئی۔واقعہ کی اطلاع ملتے ہی مقامی انتظامیہ اور غوطہ خوروں کی ٹیم جائے وقوعہ پر پہنچ گئی۔ ریسکیو اور ریلیف آپریشن شروع کیا گیا۔ ندی میں ڈوبنے والوں کو بحفاظت نکالنے کے لیے جنگ کی طرح سرچ آپریشن جاری ہے۔ضلع انتظامیہ سے موصولہ اطلاع کے مطابق راحت اور بچاؤ ٹیموں نے سات لوگوں کو بچا لیا ہے۔ تین افراد کی لاشیں نکال لی گئی ہیں۔ چار دیگر کی تلاش جاری ہے۔ ضلع انتظامیہ، سمستی پوراور ضلع انتظامیہ، پٹنہ، تال میل اور ریسکیو آپریشن کر رہے ہیں۔سب ڈویژنل آفیسر، فلڈ، اور ڈپٹی سپرنٹنڈنٹ آف پولیس، فلڈ کی قیادت میں ڈیزاسٹر مینجمنٹ ٹیم موجود ہے۔ این ڈی آر ایف اور ایس ڈی آر ایف چار لوگوں کی تلاش کر رہے ہیں۔پٹنہ کے ضلع مجسٹریٹ ڈاکٹر تیاگراجن ایس ایم نے سیلاب کے مقام پر راحت اور بچاؤ کاموں کا معائنہ کیا۔ انہوں نے حکام کو ہدایت دی کہ وہ فوری طور پر ضروری کارروائی کریں۔

ہندوستھان سماچار

ہندوستان سماچار / Mohammad Afzal Hassan