پنا، 26 مئی (ہ س)۔

مدھیہ پردیش کے ضلع پنا کے اجے گڑھ ترقیاتی بلاک میں گرام بیہر پوروا کے نیا پوروا میں منگل کے روز ایک کھیت پر کنوئیں کی کھدائی کے دوران اچانک مٹی دھنس گئی۔ اس حادثے میں ملبے میں دبے پانچ مزدوروں کی موت ہو گئی۔ مرنے والوں میں تین مزدور ایک ہی خاندان کے ہیں۔ گرام بیہر پوروا کے نیا پوروا کے رہنے والے بنو اہیروار کے کھیت پر تقریباً 10 دنوں سے سات مزدور کنوئیں کی کھدائی کا کام کر رہے تھے۔ منگل کی صبح قریب 10 بجے دو مزدور پانی پینے کے لیے کنوئیں سے باہر نکل کر اوپر آئے تھے۔ ان کے اوپر پہنچتے ہی کنوئیں کی کمزور اور گیلی مٹی اچانک بھر بھرا کر نیچے ڈھے گئی۔ اس سے کنوئیں کے اندر گہرائی میں کام کر رہے پانچ مزدور ملبے کے نیچے پوری طرح دب گئے۔ گاؤں والوں نے فوراً انتظامیہ کو اطلاع دی اور جے سی بی منگا کر مزدوروں کو نکالنے کی کوشش کی۔ اطلاع ملنے پر پولیس انتظامیہ کی ٹیم موقع پر پہنچی اور راحت و بچاو مہم شروع کی۔ بچاو ٹیم نے کافی مشقت کے بعد پانچوں مزدوروں کی لاشیں ایک ایک کر کے باہر نکال لیں اور انہیں پوسٹ مارٹم کے لیے اسپتال بھیج دیا۔

مرنے والوں کے نام آشیش یادو، راج کمار یادو، رام پال یادو، چنو یادو اور چنواد پال بتائے گئے ہیں۔ ان میں آشیش، راج کمار، رام پال اور چنو یادو ایک ہی خاندان کے ارکان ہیں۔

ضلع انتظامیہ نے رابطہ عامہ پورٹل پر حادثے کی معلومات شیئر کی ہیں۔ انتظامیہ نے کہا کہ ضلع پنا کے اجے گڑھ وکاس کھنڈ کی گرام پنچایت بیہر پوروا کے نیا پوروا میں منگل کے روز گرام پنچایت کے ذریعے زیرِ تعمیر کنوئیں کی مٹی دھنسنے کے افسوس ناک واقعے میں پانچ افراد کی موت ہوئی ہے، جبکہ دو افراد بحفاظت باہر نکل آئے۔ حادثے کے بعد ایس ڈی ای آر ایف کی ٹیم نے راحت و بچاو مہم چلا کر لاشیں نکالیں۔ اس دوران جائے وقوع پر پولیس اور انتظامی افسران کی ٹیم موجود رہی۔ حالانکہ، مرنے والوں کے اہل خانہ کا الزام ہے کہ حادثے کے 3 گھنٹے بعد بھی انتظامی افسران یا کوئی سرکاری ٹیم موقع پر نہیں پہنچی۔ گاوں والوں نے جے سی بی منگا کر خود ریسکیو مہم چلائی۔ اسی تاخیر کی وجہ سے مزدوروں کو بچایا نہیں جا سکا۔

اہل خانہ کے رکن راکیش یادو نے کہا کہ یہ کنواں پچھلے سال کی کھدائی اور پانی کی وجہ سے پہلے سے ہی کٹا ہوا تھا۔ خطرناک ہونے کی وجہ سے کوئی بھی مزدور وہاں کام کرنے کے لیے تیار نہیں تھا۔ سرپنچ کو پہلے سے ہی معلوم تھا کہ یہاں جان کا خطرہ ہے، اس لیے اس نے مزدوروں کو بلانے کے لیے عام مزدوری 350 روپے سے بڑھا کر 500 روپے کرنے کا لالچ دیا۔ مزدور پیسوں کے لیے کام کرنے گئے اور حادثے کا شکار ہو گئے۔ راکیش نے کہا کہ صبح 10 بجے حادثہ ہوا، سرکاری ٹیم دوپہر ایک بجے پہنچی۔ تب تک ہمارے لوگ دم توڑ چکے تھے۔ ہماری آواز وزیراعلیٰ ڈاکٹر موہن یادو تک پہنچنی چاہیے، تاکہ قصورواروں کے خلاف سخت کارروائی ہو۔

حادثے کی اطلاع ملتے ہی پنا کی کلکٹر اوشا پرمار موقع پر پہنچیں اور راحت و بچاو مہم کی معلومات حاصل کیں۔ اس دوران انہوں نے مرنے والوں کے اہل خانہ سے ملاقات کر کے دلاسہ دیا۔ انہیں ہر ممکن مدد کا بھروسہ دلایا۔ کلکٹر نے کہا کہ پورے واقعے کی جانچ کرائی جائے گی اور جو بھی قصوروار پائے جائیں گے، ان کے خلاف سخت کارروائی ہوگی۔

ہندوستھان سماچار

ہندوستان سماچار / انظر حسن