نئی دہلی، 25 مئی (ہ س)۔ دہلی پرو والی بال لیگ (ڈی پی وی ایل) کے ٹرائلز کے پہلے مرحلے میں دارالحکومت کے ابھرتے ہوئے والی بال کھلاڑیوں میں زبردست جوش و خروش دیکھا گیا۔ سخت گرمی اور لو جیسے موسم سمیت مشکل حالات کے باوجود نوجوان کھلاڑیوں کی ایک بڑی تعداد نے کھیل کے لیے اپنی لگن کا مظاہرہ کرتے ہوئے حصہ لیا۔

دہلی والی بال ایسوسی ایشن کے ممبران کلبیر سنگھ اور پریانک شرما بھی ٹرائلز کے دوران موجود تھے۔ ان کی موجودگی نے کھلاڑیوں کے حوصلے کو مزید بلند کرنے کا کام کیا۔ ان ٹرائلز کا مقصد گراس روٹ لیول پر باصلاحیت کھلاڑیوں کی نشاندہی کرنا تھا۔ کئی نوجوان کھلاڑیوں نے اپنی شاندار پرفارمنس سے سلیکٹرز کو متاثر کیا۔ شرکاءکے معیار پر اطمینان کا اظہار کرتے ہوئے، ڈی پی وی ایل انتظامیہ نے کہا کہ لیگ کا مقصد دہلی میں مستقبل کے والی بال اسٹارز کے لیے ایک مضبوط پلیٹ فارم فراہم کرنا ہے۔

شفاف اور پیشہ ورانہ انتخاب کے عمل کو یقینی بنانے کے لیے لیگ نے ایک تجربہ کار سلیکشن کمیٹی تشکیل دی۔ کھلاڑیوں کو ان کی تکنیکی مہارت، فٹنس، گیم سینس اور آن کورٹ پرفارمنس کی بنیاد پر جانچا گیا۔ ہندوستانی والی بال کے کھلاڑی ونیت کمار اور پرنس ملک نے بھی ٹرائلز کے دوران دورہ کیا۔ دونوں کھلاڑیوں نے شرکاءسے بات چیت کی اور ان کی حوصلہ افزائی کی۔

سابق بھارتی کپتان ونیت کمار نے تبصرہ کیا کہ شدید گرمی کے باوجود اتنے زیادہ نوجوان کھلاڑیوں کو ٹرائلز میں اتنی لگن کے ساتھ حصہ لیتے دیکھنا ناقابل یقین حد تک متاثر کن ہے۔ آج کھلاڑیوں میں جو توانائی اور جذبہ دیکھا گیا ہے اس سے ثابت ہوتا ہے کہ والی بال دہلی میں بے پناہ امکانات رکھتا ہے۔ ڈی پی وی ایل جیسے اقدامات کھلاڑیوں کی آنے والی نسلوں کے لیے ایک مضبوط راہ ہموار کر سکتے ہیں۔

بھارتی کھلاڑی پرنسملک نے بھی ایونٹ اور کھلاڑیوں کو سراہتے ہوئے کہا کہ ٹرائلز کے دوران ماحول انتہائی مثبت اور پرجوش تھا۔ کھلاڑیوں نے کورٹ پر اپنی بہترین کارکردگی کا مظاہرہ کیا۔ ہندوستانی والی بال کو قطعی طور پر اسی قسم کی زمینی پہل کی ضرورت ہے۔ ڈی پی وی ایل ابھرتے ہوئے ٹیلنٹ کے لیے ایک شاندار پلیٹ فارم تشکیل دے رہا ہے۔

ڈی پی وی ایل کے بانی نیتی راوت اور جسودا گلیا نے ٹرائلز کے پہلے مرحلے کے دوران ملنے والے زبردست ردعمل پر خوشی کا اظہار کیا۔ انہوں نے کھلاڑیوں، کوچز، والدین اور تعاون کرنے والوں کا شکریہ ادا کیا۔

مرحلہ 1 کے کامیاب اختتام کے بعد، دہلی پرو والی بال لیگ نے اب آنے والے مراحل کے لیے تیاریاں شروع کر دی ہیں۔ لیگ کا مقصد دہلی میں والی بال کا ایک مضبوط انفراسٹرکچر بنانا اور نوجوان کھلاڑیوں کو پیشہ ورانہ مواقع تک رسائی فراہم کرنا ہے۔

ہندوستھان سماچار

---------------

ہندوستان سماچار / عبدالسلام صدیقی