بڈگام عصمت دری اور قتل کیس کا اہم ملزم گرفتارسرینگر، 25 مئی (ہ س)۔ پولیس نے پیر کو بڈگام میں ایک نابالغ لڑکی کی عصمت دری اور قتل کیس میں ایک ملزم کو گرفتار کیا۔ ایک اعلیٰ پولیس افسر نے بتایا کہ ملزمین میں سے ایک، جس کی شناخت مدثر کے نام سے ہوئی ہے، کو واقعے کے 24 گھنٹوں کے اندر گرفتار کر لیا گیا ہے۔ انہوں نے کہا کہ دیگر ملزمان کی گرفتاری کے لیے کوششیں جاری ہیں۔ انہوں نے مزید کہا کہ پولیس اس بات کو یقینی بنائے گی کہ ملزمان کو ایسے گھناؤنے جرم کی سخت ترین سزا دی جائے۔ واضح رہے ہفتہ کے روز بڈگام کے گالوان پورہ علاقے میں ایک 12 سالہ لڑکی کو اغوا کیا گیا، اس کی عصمت دری کی گئی اور پھر اس کا قتل کیا گیا، جس سے پورے علاقے میں صدمے کی لہر دوڑ گئی۔ اتوار کے روز، 23 مئی کو لاپتہ ہونے کے چند گھنٹے بعد، اس کے گاؤں کے قریب ایک کھیت سے نابالغ لڑکی کی لاش برآمد ہونے کے بعد پولیس نے ایک خصوصی تحقیقاتی ٹیم تشکیل دی تھی۔ بڈگام کے سینئر سپرنٹنڈنٹ پولیس کے کے ہری پرساد نے کہا تھا کہ ابتدائی تحقیقات سے پتہ چلتا ہے کہ یہ معاملہ عصمت دری اور قتل کا ہے۔ لیفٹیننٹ گورنر منوج سنہا، وزیر اعلیٰ عمر عبداللہ، دیگر سیاست دانوں، مذہبی اور سول سوسائٹی کے ذمہ داران نے اس واقعہ کی مذمت کی ہے۔ہندوستھان سماچار

ہندوستان سماچار / Aftab Ahmad Mir