جموں, 25 مئی (ہ س)۔ جموں و کشمیر پولیس نے ایک تازہ سائبر سیفٹی ایڈوائزری جاری کرتے ہوئے عوام کو جعلی آن لائن ڈسکاؤنٹس، دلکش اشتہارات اور فرضی شاپنگ آفرز سے محتاط رہنے کی ہدایت دی ہے۔ پولیس کے مطابق سائبر مجرم سوشل میڈیا پلیٹ فارمز پر لمیٹڈ ٹائم ڈیل، بھاری رعایتوں اور پرکشش آفرز کے نام پر لوگوں کو دھوکہ دے رہے ہیں۔ایڈوائزری میں کہا گیا ہے کہ جعلساز صارفین میں جلد بازی اور خوف پیدا کرکے انہیں مشکوک لنکس پر کلک کرنے اور بغیر تصدیق آن لائن ادائیگی کرنے پر مجبور کرتے ہیں۔ اس طرح کے فراڈ کے ذریعے بینکنگ تفصیلات، ذاتی معلومات اور رقم چوری کی جا رہی ہے۔

پولیس کے مطابق دھوکہ باز جعلی ویب سائٹس، کلون شاپنگ پورٹلز اور مشکوک پیمنٹ گیٹ ویز کا استعمال کرتے ہوئے شہریوں کو نشانہ بنا رہے ہیں۔ عوام سے اپیل کی گئی ہے کہ آن لائن خریداری کرتے وقت ہر آفر کی اچھی طرح تصدیق کریں اور ایس ایم ایس، واٹس ایپ، اشتہارات یا سوشل میڈیا کے ذریعے موصول ہونے والے مشتبہ لنکس کھولنے سے گریز کریں۔پولیس نے مزید کہا کہ جو آفرز حقیقت سے بڑھ کر اچھی محسوس ہوں، ان پر ہرگز اعتماد نہ کیا جائے اور صرف معتبر و تصدیق شدہ پلیٹ فارمز کے ذریعے ہی خریداری اور مالی لین دین انجام دیا جائے۔ایڈوائزری میں کہا گیا کہ جعلی ڈسکاؤنٹس اور ناقابل یقین آن لائن آفرز سائبر مجرموں کے عام ہتھکنڈے ہیں۔ عوام کو چوکس رہنے اور ایسے فراڈ سے بچنے کی ضرورت ہے۔پولیس نے شہریوں کو ہدایت دی کہ کسی بھی سائبر فراڈ، مشکوک لین دین یا آن لائن دھوکہ دہی کی صورت میں فوری طور پر قومی سائبر ہیلپ لائن 1930 پر رابطہ کریں یا سرکاری سائبر کرائم پورٹل پر شکایت درج کرائیں۔

ہندوستھان سماچار

---------------

ہندوستان سماچار / محمد اصغر