سپول، 24 مئی (ہ س)۔ ضلع کے راگھوپور تھانہ علاقے میں ہفتہ کی دیر رات پولیس ٹیم پر حملے سے علاقے میں خوف و ہراس پھیل گیا۔

واقعہ راگھوپور پنچایت کے مہادلت ٹولہ میں پیش آیا، جہاں رات تقریباً ساڑھے گیارہ بجے پولیس کارروائی کے دوران کچھ لوگوں نے پولیس ٹیم پر حملہ کردیا۔

حملے میں ایک اے ایس آئی اور ایک خاتون ہوم گارڈ زخمی ہوئے جب کہ تھانہ کی سرکاری گاڑی کو بھی نقصان پہنچا۔

اطلاعات کے مطابق حملے کے دوران افراتفری پھیل گئی۔ اس دوران یہ خبریں سامنے آئیں کہ خاتون ہوم گارڈ کی رائفل چھین لی گئی۔

اگرچہ رائفل مبینہ طور پر بعد میں ایک کھیت سے برآمد ہوئی تھی لیکن پولیس انتظامیہ نے سرکاری طور پر اس کی تصدیق نہیں کی ہے۔

زخمیوں کی شناخت اے ایس آئی اجے کمار (40 سال) اور خاتون ہوم گارڈ کاجل کماری (19 سال) کے طور پر ہوئی ہے۔ دونوں کو علاج کے لیے اسپتال لے جایا گیا، جہاں ان کا علاج جاری ہے۔

واقعہ کی اطلاع ملتے ہی محکمہ پولیس میں کہرام مچ گیا۔ راگھوپور تھانہ کی طرف سے سینئر افسران کو فوری طور پر اطلاع دی گئی، جس کے بعد کئی تھانوں کی پولیس جائے وقوعہ پر پہنچی۔ ویرپور کے ایس ڈی پی او اور سپول ایس پی بھی پولیس کی بھاری نفری کے ساتھ جائے وقوعہ پر پہنچے اور علاقے کی سیکورٹی سنبھال لی۔ رات تک پولیس کی بھاری نفری علاقے میں موجود رہی۔

پولیس فی الحال پورے واقعہ کی تحقیقات کر رہی ہے۔ حملے کے پیچھے کی وجہ اور اس میں ملوث افراد کی شناخت کی تحقیقات کی جا رہی ہیں۔ انتظامیہ کے سرکاری بیان کے بعد ہی پورے واقعہ کی واضح تصویر سامنے آئے گی۔

ہندوستھان سماچار

ہندوستان سماچار / Mohammad Afzal Hassan