ممبئی ، 23 مئی (ہ س)۔ ممبئی ایئرپورٹ پر امیگریشن محکمہ نے ایک بنگلہ دیشی شہری کو جعلی بھارتی دستاویزات کا استعمال کرتے ہوئے عمان جانے کی کوشش کے دوران گرفتار کر لیا۔ اس معاملے کی تفصیلی جانچ سہارا پولیس اسٹیشن کی ٹیم کر رہی ہے۔ پولیس افسر کے مطابق ملزم جب امیگریشن کاؤنٹر پر پہنچا تو جانچ کے دوران امیگریشن افسر گنیش گولی کو اس پر شبہ ہوا۔ملزم کا موبائل فون چیک کیے جانے پر اس میں بنگلہ دیشی قومی شناختی کارڈ، اس کی اہلیہ لپی پروین کے بنگلہ دیشی پاسپورٹ کی سافٹ کاپی اور اس کے بیٹے لبیب الاسلام سے متعلق ویزا دستاویزات برآمد ہوئے۔ اس کے بعد امیگریشن حکام نے ملزم کو مزید کارروائی کے لیے سہارا پولیس کے حوالے کر دیا۔جانچ کے دوران معلوم ہوا کہ ملزم ’’ایس کے ملن‘‘ نام سے سفر کرنے کی کوشش کر رہا تھا، تاہم دستاویزات مشتبہ پائے جانے پر تفصیلی تفتیش کی گئی، جس میں اس کی اصل شناخت محمد اسد الرحمٰن (30) کے طور پر ہوئی۔پولیس کے مطابق ملزم بنگلہ دیش کے ضلع ساتکھیرا کے شیامن نگر علاقے کا رہنے والا ہے۔تفتیش کے دوران اسد الرحمٰن نے اعتراف کیا کہ وہ 2014 میں غیر قانونی طور پر بھارت میں داخل ہوا تھا۔تحقیقات میں یہ بھی سامنے آیا کہ اس نے جعلی بھارتی دستاویزات حاصل کر لیے تھے، جن میں پیدائشی سرٹیفکیٹ، آدھار کارڈ، ووٹر آئی ڈی اور ڈیجیٹل راشن کارڈ شامل ہیں۔پولیس نے ملزم کے قبضے سے عمان کا ورک ویزا، بورڈنگ پاس، موبائل فون اور دیگر اہم دستاویزات ضبط کر لیے ہیں۔تحقیقات سے معلوم ہوا ہے کہ ملزم نے انہی جعلی دستاویزات کی بنیاد پر کولکاتا پاسپورٹ دفتر سے بھارتی پاسپورٹ بھی حاصل کیا تھا۔ پولیس اس پورے معاملے کی گہرائی سے تفتیش کر رہی ہے۔ہندوستھان سماچار
--------------------
ہندوستان سماچار / جاوید این اے
