جموں, 02 مئی (ہ س)۔ پولیس نے سوشل میڈیا پر گردش کرنے والی ان خبروں کی سختی سے تردید کی ہے جن میں دعویٰ کیا جا رہا تھا کہ اروند کیجروال اور بھگوت مان اتوار کو ڈوڈہ میں ہونے والی ایک ریلی میں شرکت کریں گے۔پولیس حکام کے مطابق یہ دعوے مکمل طور پر جھوٹے، بے بنیاد اور بغیر کسی سرکاری تصدیق کے ہیں۔ اس حوالے سے کسی بھی مجاز اتھارٹی کی جانب سے نہ کوئی اجازت دی گئی ہے اور نہ ہی ایسی کسی ریلی کے انعقاد کی کوئی اطلاع موصول ہوئی ہے۔

پولیس نے واضح کیا کہ اس قسم کی غلط معلومات عوام میں بے چینی اور انتشار پیدا کر سکتی ہیں، اس لیے عوام کو چاہیے کہ غیر مصدقہ خبروں پر یقین نہ کریں اور صرف مستند ذرائع سے ہی معلومات حاصل کریں۔حکام نے خبردار کیا کہ سوشل میڈیا پر جھوٹی خبریں پھیلانے والوں کے خلاف قانون کے تحت سخت کارروائی عمل میں لائی جائے گی۔ عوام سے اپیل کی گئی ہے کہ وہ ذمہ داری کا مظاہرہ کریں اور کسی بھی خبر کو آگے بڑھانے سے قبل اس کی تصدیق ضرور کریں۔

ہندوستھان سماچار

---------------

ہندوستان سماچار / محمد اصغر