ڈاکٹر جتیندر سنگھ نے ادھم پور میں مجوزہ ہوائی اڈے کو شہری پروازوں کے لیے فعال بنانے کی پیش رفت کا جائزہ لیا

جموں، 07 اپریل (ہ س)۔ مرکزی وزیر ڈاکٹر جتیندر سنگھ نے ادھم پور میں مجوزہ ہوائی اڈے کو شہری پروازوں کے لیے فعال بنانے کی پیش رفت کا جائزہ لیتے ہوئے بتایا کہ زمین کی منتقلی کا عمل یو ٹی حکومت کی منظوری کے ساتھ شروع ہو چکا ہے۔ انہوں نے کہا کہ عبوری طور پر موجودہ احاطے سے اے ٹی آر پروازیں شروع کرنے کے لیے فبری کیشن کام کا ٹینڈر بھی جاری کر دیا گیا ہے اور آئندہ چند ماہ میں پروازیں شروع ہونے کی توقع ہے۔

وزیر موصوف نے معیاری اور آسان طبی سہولیات کی اہمیت پر زور دیتے ہوئے کہا کہ آرمی کمانڈ اسپتال ادھم پور نے عام شہریوں کو بھی سپر اسپیشلٹی طبی خدمات فراہم کرنے پر رضامندی ظاہر کی ہے۔ انہوں نے ضلع انتظامیہ اور عوامی نمائندوں کو ہدایت دی کہ عوام میں اس سہولت کے بارے میں بیداری پیدا کی جائے اور مستحق مریضوں کی نشاندہی کر کے انہیں خصوصی علاج کے لیے ریفر کیا جائے۔ انہوں نے یہ بھی تجویز دی کہ کمانڈ اسپتال کی جانب سے سہ ماہی بنیادوں پر طبی کیمپ منعقد کیے جائیں۔

ڈاکٹر جتیندر سنگھ نے ون ڈسٹرکٹ ون پروڈکٹ (او ڈی او پی) اسکیم کے تحت مقامی دودھ سے تیار ہونے والی مصنوعات کلاڑی کی برانڈنگ کا بھی جائزہ لیا۔ انہوں نے بتایا کہ میسور کی ایک قومی سطح کی ادارہ اس پروجیکٹ پر کام کر رہی ہے تاکہ کلاڑی کو جدید ٹیکنالوجی کے ذریعے قومی اور بین الاقوامی سطح کی فوڈ چینز کے لیے موزوں بنایا جا سکے، جبکہ اس کی کوالٹی اور ذائقہ برقرار رکھا جائے۔ انہوں نے کہا کہ اس اقدام سے مقامی لوگوں کے لیے روزگار کے مواقع بڑھیں گے اور آمدنی میں اضافہ ہوگا۔

یہ جائزہ اجلاس ضلع ترقیاتی رابطہ و نگرانی کمیٹی (دیشا) کے تحت منعقد ہوا، جس میں مرکزی معاونت یافتہ اسکیموں اور بنیادی ڈھانچے کے اہم منصوبوں کی پیش رفت کا جائزہ لیا گیا۔ وزیر نے دہلی امرتسر کٹرا ایکسپریس وے منصوبے کی پیش رفت پر اطمینان ظاہر کرتے ہوئے کہا کہ اس سے خطے میں رابطہ بہتر ہوگا، سیاحت کو فروغ ملے گا اور اقتصادی ترقی میں مدد ملے گی۔

انہوں نے منتالائی میں قائم انٹرنیشنل یوگا سینٹر کے حوالے سے کہا کہ اسے پبلک پرائیویٹ پارٹنرشپ (پی پی پی) ماڈل کے تحت فعال بنایا جا سکتا ہے، جس سے بہتر انتظام، بنیادی ڈھانچے کا مؤثر استعمال اور ویلنیس ٹورزم کو فروغ ملے گا۔ اپنے خطاب میں ڈاکٹر جتیندر سنگھ نے سڑک، پینے کے پانی اور بجلی کی فراہمی کو اولین ترجیح دینے کی ہدایت دی اور متعلقہ اداروں کو منصوبوں کی بروقت تکمیل یقینی بنانے پر زور دیا۔ انہوں نے عوامی نمائندوں اور ضلعی انتظامیہ کے درمیان بہتر تال میل کی بھی ضرورت پر زور دیا۔

پردھان منتری گرام سڑک یوجنا (پی ایم جی ایس وائی) کے تحت دیہی رابطہ سڑکوں کے منصوبوں کا جائزہ لیتے ہوئے وزیر نے جنگلاتی منظوری سے متعلق مسائل کا ذکر کیا اور ڈویژنل فاریسٹ آفیسر کو ہدایت دی کہ وہ جلد از جلد مقامی ارکان اسمبلی کے ساتھ میٹنگ منعقد کر کے رکاوٹوں کو دور کریں۔ بجلی کی صورتحال کا جائزہ لیتے ہوئے انہوں نے بجلی کی ترسیلی نظام کو مضبوط بنانے، اضافی ٹرانسفارمر نصب کرنے اور این ٹی پی سی کے اشتراک سے جامع منصوبہ تیار کرنے کی ہدایت دی۔

اجلاس کے دوران ڈپٹی کمشنر منگا شیرپا نے جل جیون مشن، امرت 2.0، پی ایم جی ایس وائی، پردھان منتری آواس یوجنا، پی ایم سوریہ گھر یوجنا اور پی ایم شری اسکولوں سمیت مختلف اسکیموں کی پیش رفت پر تفصیلی پریزنٹیشن پیش کی۔ اس موقع پر بتایا گیا کہ ادھم پور میں نئے گورنمنٹ میڈیکل کالج کا ریڈیالوجی بلاک جلد مکمل ہوگا اور جون 2026 تک کالج حوالے کر دیا جائے گا۔

اجلاس میں ایم ایل اے چنینی بلونت سنگھ منکوٹیا، ایم ایل اے ادھم پور ویسٹ پون کمار گپتا، ایم ایل اے ادھم پور ایسٹ رنبیر سنگھ پٹھانیا، ایم ایل اے رام نگر سنیل بھاردواج سمیت ضلعی انتظامیہ کے سینئر افسران اور مختلف محکموں کے نمائندوں نے شرکت کی۔ بعد ازاں، ڈاکٹر جتیندر سنگھ نے ممبر پارلیمنٹ لوکل ایریا ڈیولپمنٹ اسکیم (ایم پی ایل اے ڈی ایس) کے تحت گورنمنٹ میڈیکل کالج ادھم پور کو ایک ایمبولینس عطیہ کی، جس سے ضلع میں ہنگامی طبی خدمات اور مریضوں کی منتقلی کو مزید بہتر بنانے میں مدد ملے گی۔

ہندوستھان سماچار

---------------

ہندوستان سماچار / محمد اصغر