امپھال، 7 اپریل (ہ س)۔ منی پور کے بشنو پور ضلع میں راکٹ حملے میں دو بچے ہلاک ہو گئے۔ حملے سے کشیدگی اور اشتعال انگیزی میںشدید اضافہ ہوگیا۔ جائے وقوعہ پر پولیس کی بھاری نفری تعینات کر دی گئی ہے۔ فی الحال اس حملے کے پیچھے کارفرما افراد کی شناخت کی سرکاری طور پر تصدیق نہیں کی گئی ہے۔ تفتیش جاری ہے۔ابتدائی معلومات کے مطابق، حملہ پیر اور منگل کی درمیانی شب تقریباً 2 بجے کے قریب ترونگلاوبی آوانگ لیکائی میں ہوا، جو موئرنگ پولیس اسٹیشن کے دائرہ اختیار میں ہے، جہاں ایک مشتبہ میزائل ایک مکان پر گرا۔ دھماکے میں ایک پانچ سالہ لڑکا اور پانچ ماہ کی بچی موقع پر ہی جاں بحق ہو گئی جبکہ ان کی والدہ شدید زخمی ہو گئیں۔ انہیں راج میڈیسٹی اسپتال میں داخل کرایا گیا ہے۔ ہسپتال ذرائع کے مطابق خاتون کی حالت بدستور تشویشناک ہے۔اس واقعہ سے مقامی لوگوں میں شدید غم و غصہ پھیل گیا۔ موئرنگ میں لوگ احتجاج کے لیے سڑکوں پر نکل آئے، چوراچند پور جانے والے دو آئل ٹینکروں اور ایک مال بردار ٹرک کو آگ لگا دی، جس سے صورتحال مزید بگڑ گئی۔ مظاہرین نے مورینگ تھانے کا گھیراو¿ کرتے ہوئے ملزمان کے خلاف فوری کارروائی کا مطالبہ کیا۔ انہوں نے احتجاجاً اسٹیشن کے باہر ٹائر اور ملبہ جلایا۔پولیس حکام کے مطابق صورتحال کشیدہ ہے تاہم صورتحال پر کڑی نظر رکھی جارہی ہے۔میڈیا سے بات کرتے ہوئے وزیر اعلیٰ وائی کھیم چند سنگھ نے اس واقعہ کی سخت مذمت کرتے ہوئے اسے ’وحشیانہ فعل‘ قرار دیا اور ذمہ داروں کی شناخت اور ان کے خلاف سخت کارروائی کرنے کا عزم کیا۔ انہوں نے واضح کیا کہ ریاست میں اس طرح کے پرتشدد واقعات کو کسی بھی قیمت پر برداشت نہیں کیا جائے گا۔موئرنگ کے ایم ایل اے تھوکچوم شانتی سنگھ نے بھی جائے وقوعہ کا دورہ کیا اور اس حملے کو دہشت گردی کی کارروائی قرار دیا اور متاثرہ خاندان کے ساتھ اپنی گہری تعزیت کا اظہار کیا۔ انہوں نے انتظامیہ سے مطالبہ کیا کہ ملزمان کے خلاف سخت کارروائی کی جائے۔

ہندوستھان سماچار

ہندوستان سماچار / Mohammad Khan