پڈوچیری، 6 اپریل (ہ س) پڈوچیری اسمبلی انتخابات اپنے آخری مرحلے میں داخل ہو گئے ہیں۔ اس دوران کانگریس لیڈر اور رکن پارلیمنٹ راہل گاندھی نے یہاں ایک عوامی ریلی کے دوران کئی اہم اعلانات کئے۔ انہوں نے بے روزگار نوجوانوں کو ماہانہ 2000 روپے اور خواتین کو سرکاری بسوں میں مفت سفر کا وعدہ کیا۔
کانگریس لیڈر راہل گاندھی اور پرینکا گاندھی 9 اپریل کو ہونے والے انتخابات کی مہم کے لیے 6 اپریل کو تمل ناڈو پہنچے۔ وہ دہلی سے چنئی گئے اور وہاں سے ہیلی کاپٹر کے ذریعے پڈوچیری گئے۔
پڈوچیری کے لاسپیٹ میں ایک عوامی ریلی سے خطاب کرتے ہوئے راہل گاندھی نے اعلان کیا کہ پڈوچیری میں خواتین کو مفت بس سروس ملے گی۔ انہوں نے مزید کہا کہ کانگریس پڈوچیری کو مکمل ریاست کا درجہ دینے کے لیے پرعزم ہے۔ انہوں نے کہا کہ سرکاری ملازمتوں کے لیے عمر کی حد بڑھا کر 40 سال کی جائے گی۔ ہر خاندان کو 20 لاکھ روپے کا ہیلتھ انشورنس ملے گا، اور کانگریس کی حکومت بننے کے چھ ماہ کے اندر بلدیاتی انتخابات کرائے جائیں گے۔ انہوں نے کہا کہ پڈوچیری میں سرکاری اور نجی دونوں شعبوں میں روزگار کے مواقع کو وسعت دی جائے گی۔ انہوں نے کہا کہ بے روزگار نوجوانوں کو ماہانہ 2000 روپئے دیئے جائیں گے۔
راہل گاندھی نے الزام لگایا کہ مرکز کے زیر انتظام حکومت نے جعلی ادویات کے معاملے میں کوئی کارروائی نہیں کی ہے۔ انہوں نے یہ بھی کہا کہ اسکولوں کے قریب شراب کی دکانیں کھولی جارہی ہیں اور مندر کی زمین فروخت کی جارہی ہے۔
اب انتخابات میں صرف 3 دن رہ گئے ہیں اور تمام سیاسی جماعتوں کے رہنما بھرپور طریقے سے انتخابی مہم میں مصروف ہیں۔
---------------
ہندوستان سماچار / عبدالسلام صدیقی
