بارامتی، 6 اپریل (ہ س) مہاراشٹر کی نائب وزیر اعلیٰ سنیترا پوار نے پیر کے روز بارامتی اسمبلی حلقے کے ضمنی انتخاب کے لیے اپنا نامزدگی پرچہ داخل کرتے ہوئے جذباتی خطاب کرتے ہوئے اجیت پوار کو خراج عقیدت پیش کیا۔ اس موقع پر کئی سرکردہ سیاسی رہنما بھی موجود تھے۔
پرچہ نامزدگی داخل کرتے وقت سنیترا پوار آبدیدہ ہو گئیں اور کہا کہ انہوں نے کبھی نہیں سوچا تھا کہ انہیں اس طرح ضمنی انتخاب لڑنا پڑے گا۔ انہوں نے کہا کہ وہ چار مرتبہ وزیر اعلیٰ رہنے والے شرد پوار کی بہو اور چھ مرتبہ نائب وزیر اعلیٰ رہنے والے اجیت پوار کی اہلیہ ہیں۔
انہوں نے کہا کہ اجیت پوار نے بارامتی میں آخری سانس لی اور بارامتی کے عوام کو دیکھ کر ہی انہیں حوصلہ ملا۔ ان کے مطابق بارامتی کی ہر عمارت میں اجیت پوار کی محنت اور چھاپ موجود ہے اور وہ اس علاقے کی عزت کو کسی صورت کم نہیں ہونے دیں گی۔
سنیترا پوار نے کہا کہ اجیت پوار نے ووٹ شیئر کے کئی ریکارڈ قائم کیے اور یہ انتخاب محض ایک سیاسی مقابلہ نہیں بلکہ ان کو خراج عقیدت پیش کرنے کا موقع ہے، جبکہ ان کا عوامی دربار اور ترقیاتی کام جاری رہیں گے۔
اسی دوران راہوری اسمبلی حلقے کے ضمنی انتخاب کے لیے بھارتیہ جنتا پارٹی کے امیدوار اکشے شیواجی راؤ کارڈی لے نے بھی اپنا نامزدگی پرچہ داخل کیا۔ یہ نشست سابق رکن اسمبلی شیواجی راؤ کارڈی لے کے انتقال کے بعد خالی ہوئی ہے۔
بارامتی اور راہوری دونوں نشستوں پر بلامقابلہ انتخاب کرانے کی کوششیں وزیر اعلیٰ دیویندر فڑنویس، نائب وزیر اعلیٰ ایکناتھ شندے اور نیشنلسٹ کانگریس پارٹی (اجیت پوار گروپ) کے رہنماؤں کی جانب سے کی جا رہی ہیں۔
قابل ذکر ہے کہ بارامتی کے سابق رکن اسمبلی اور سابق نائب وزیر اعلیٰ اجیت پوار کا 28 جنوری 2026 کو ایک طیارہ حادثے میں انتقال ہو گیا تھا، جس کے بعد یہ نشست خالی ہوئی اور ضمنی انتخاب کا اعلان کیا گیا۔ اس انتخاب کے لیے نامزدگی داخل کرنے کی آخری تاریخ پیر تھی، جبکہ پولنگ 23 اپریل کو اور ووٹوں کی گنتی 4 مئی کو ہوگی۔
ہندوستھان سماچار
--------------------
ہندوستان سماچار / جاوید این اے
