نئی دہلی، 6 اپریل (ہ س)۔ پٹیالہ ہاؤس کورٹ نے شمال مشرق میں نسلی گروہوں کو تربیت فراہم کرنے کے لیے ہندوستان میں داخل ہونے کے الزام میں گرفتار کیے گئے سات غیر ملکی شہریوں کو 30 دن کی عدالتی تحویل میں دے دیا ہے۔ ان غیر ملکی شہریوں کی قومی تفتیشی ایجنسی (این آئی اے) کی تحویل کی مدت پیر کو ختم ہو رہی تھی، جس کے بعد انہیں عدالت میں پیش کیا گیا۔

عدالت نے نوٹ کیا کہ یہ غیر ملکی شہری غیر قانونی طور پر میانمار میں داخل ہوئے تھے اور اس کے بعد میزورم کے محفوظ علاقوں میں داخل ہوئے تھے، جہاں انہوں نے مختلف نسلی گروہوں سے رابطہ قائم کیا۔ ان پر غیر قانونی ہتھیاروں کی فراہمی، ان نسلی گروہوں کو تربیت فراہم کرنے اور ڈرون چلانے میں ان کی مدد کرنے کا الزام ہے۔ ان سات غیر ملکی شہریوں میں سے چھ یوکرین کے شہری اور ایک امریکی شہری ہے۔

این آئی اے کے مطابق، یہ غیر ملکی شہری درست ویزا پر ہندوستان پہنچے اور بعد میں میزورم میں داخل ہوئے، جو ایک محفوظ علاقہ ہے۔ اس کے بعد، وہ میانمار میں داخل ہوئے اور نسلی عسکریت پسند گروپوں سے رابطہ قائم کیا۔ این آئی اے نے مزید کہا کہ ان غیر ملکی شہریوں نے خود میانمار میں تربیت حاصل کی تھی، جس کے بعد انہوں نے انتہاپسند گروپوں کو تربیت فراہم کرنا شروع کی۔ ان گروپوں کا تعلق بھارت میں سرگرم باغی تنظیموں سے ہے۔ انہیں یورپ سے ڈرون کی ایک بڑی کھیپ لانے کے الزامات کا بھی سامنا ہے۔ این آئی اے نے ان کے خلاف غیر قانونی سرگرمیاں (روک تھام) ایکٹ (یو اے پی اے) کی مختلف دفعات کے تحت ایف آئی آر درج کی ہے۔

ہندوستھان سماچار

---------------

ہندوستان سماچار / عبدالواحد