جموں, 03 اپریل (ہ س)سابق ایم ایل سی وکرمادتیہ سنگھ نے جموں و کشمیر کے سرحدی علاقوں میں ہندوستانی فوج کی جانب سے جاری عوامی رابطہ اور ترقیاتی اقدامات کو قابلِ ستائش قرار دیا ہے۔

وکرمادتیہ سنگھ نے حال ہی میں ضلع کپواڑہ کے سرحدی علاقوں ٹنگدھار اور کرناہ کا دورہ کیا، جہاں انہوں نے مقامی شہریوں، طلبہ اور فوجی اہلکاروں سے ملاقات کی اور جاری فلاحی و تعلیمی پروگراموں کا جائزہ لیا۔ اس دوران وہ لائن آف کنٹرول پر واقع ٹیٹوال میں شاردہ مندر میں نوراترا تہوار کی تقریبات میں بھی شریک ہوئے۔

انہوں نے آرمی گڈ وِل اسکول حاجی نار اور کمیونٹی ریڈیو روحِ کرناہ جیسے منصوبوں کو سراہتے ہوئے کہا کہ یہ اقدامات نوجوانوں کو بااختیار بنانے، تعلیم کے فروغ اور کمیونٹی روابط کو مضبوط کرنے میں اہم کردار ادا کر رہے ہیں۔

وکرمادتیہ سنگھ نے کہا کہ فوج کی جانب سے تعلیم، صحت، بنیادی ڈھانچے اور فلاحی شعبوں میں جاری کوششوں سے دور دراز علاقوں میں لوگوں کی زندگیوں میں نمایاں بہتری آئی ہے اور عوام اور سیکورٹی فورسز کے درمیان اعتماد میں اضافہ ہوا ہے۔

انہوں نے وزیر اعظم نریندر مودی اور وزیر دفاع راج ناتھ سنگھ کی قیادت کو بھی سراہتے ہوئے کہا کہ سرحدی علاقوں کی ترقی کے لیے ان کی مسلسل کوششیں قابلِ تعریف ہیں۔

انہوں نے مزید کہا کہ اس طرح کے اقدامات نہ صرف فوری مسائل کے حل میں مددگار ثابت ہو رہے ہیں بلکہ نوجوانوں کے لیے نئے مواقع پیدا کر کے طویل مدتی ترقی اور قومی یکجہتی کو بھی فروغ دے رہے ہیں۔

ہندوستھان سماچار

---------------

ہندوستان سماچار / محمد اصغر