بیٹن روج (لوزیانا) امریکہ، 20 اپریل (ہ س)۔ امریکی ریاست لوزیانا کے شہر شریوپورٹ میں اتوار کی صبح ایک مسلح شخص نے تین گھروں میں گھس کر آٹھ بچوں کو گولی مار کر ہلاک کر دیا۔ جنوری 2024 کے بعد سے یہ ملک میں سب سے مہلک اجتماعی گولہ باری کا واقعہ ہے۔ اس واقعے نے شریوپورٹ کے آس پاس کے لوگوں کودہلا دیا۔ جو بھی موقع پر پہنچا، وہ زار وقطار رونے لگا۔ لوزیانا میں کیڈو پیرش کورونر دفتر(ایک آزاد ایجنسی جو موت کی وجہ کی تحقیقات کرتی ہے) نے کہا ہے کہ اس دوران ایک 13 سالہ لڑکا گھر کی چھت سے چھلانگ لگا کر زخمی ہو گیا۔ اس کی کچھ ہڈیاں ٹوٹ گئی ہیں ۔

سی این این چینل اور سی بی ایس نیوز کی رپورٹس کے مطابق شریوپورٹ پولیس کے ترجمان کرس بورڈیلون نے ایک پریس کانفرنس میں بتایا کہ کل 10 افراد فائرنگ کا نشانہ بنے۔ مشتبہ حملہ آور کی شناخت شمر ایلکنز کے نام سے ہوئی ہے۔ وہ پولیس کی فائرنگ میں مارا گیا۔ جاں بحق ہونے والے بچوں میں تین لڑکے اور پانچ لڑکیاں شامل ہیں۔ ان میں سے سات بہن بھائی ہیں۔ انہوں نے بتایا کہ شوٹنگ میں زائلا ایلکنز (3)،شائیلا ایلکنز (5)، کائلا پیو (6)، لیلا پیو (7)، مارکیڈان پیو (10)، ساریہ اسنو (11)، کھیڈیرین اسنو (6) اور بریلون اسنو (5) ہلاک ہوگئے۔

شریوپورٹ پولیس نے ایک بیان میں کہا کہ فائرنگ میں دو خواتین شدید زخمی ہو گئیں۔ فائرنگ سے ایک نوجوان بھی زخمی ہوا۔ پولیس کے مطابق ملزم نے پہلے سڑک پر ایک خاتون کو گولی ماری۔ اس کے بعد وہ قریبی گھر میں داخل ہوا اور وہاں آٹھ افراد کو گولی مار دی۔ لوزیانا کے اٹارنی جنرل لز مرل نے ایکس پوسٹ کو بتایا کہ متعدد قانون نافذ کرنے والے ادارے اس واقعے کی تحقیقات کر رہے ہیں۔ ریاستی نمائندہ ٹیمی فیلپس نے بتایا کہ شوٹنگ کے دوران کچھ بچوں نے پچھلے دروازے سے فرار ہونے کی کوشش بھی کی۔

پولیس رپورٹس کے مطابق اس واقعے کے ملزم ایلکنز کو 2019 میں اسلحے سے متعلق الزام میں گرفتار کیا گیا تھا۔ امریکی فوج کے مطابق ایلکنز نے سات سال تک لوزیانا آرمی نیشنل گارڈ میں بھی خدمات انجام دیں۔شریوپورٹ کے میئر ٹام آرسینو نے کہا کہ اس واقعے نے پورے شہر کو ہلا کر رکھ دیا ہے۔ گن وائلنس آرکائیو کے مطابق، اس سال اب تک امریکہ میں کم از کم 114 بڑے پیمانے پر فائرنگ کے واقعات ہو چکے ہیں۔

سٹی کونسل کی رکن تباتھا ایچ ٹیلر جائے وقوعہ پر اس دل دوز منظر کو دیکھ کر رو پڑیں۔ انہوں نے اسے شریوپورٹ کی تاریخ کا بدترین واقعہ قرار دیتے ہوئے کہا کہ یہ خوفناک ہے۔ ”میرا دل بے بس ہو گیا ہے“۔ شریوپورٹ پولیس چیف وین اسمتھ نے کہا،”میں تویہ سوچ بھی نہیں پا رہا ہوں کہ ایسا کیسے ہو سکتا ہے۔ مجھے نہیں معلوم کہ کیا کہیں۔“ امریکی ایوان نمائندگان کے اسپیکر مائیک جانسن نے ان ہلاکتوں کو دل دہلا دینے والا قرار دیا۔ جانسن کانگریس میں شریو پورٹ علاقے کی نمائندگی کرتے ہیں۔ انہوں نے کہا کہ ہم اس مشکل وقت میں متاثرین کے ساتھ کھڑے ہیں۔

ہندوستھان سماچار

ہندوستان سماچار / محمد شہزاد