جموں, 17 اپریل (ہ س)۔

جموں میں ایک دلخراش حادثے کے دوران گورنمنٹ ویمن کالج گاندھی نگر کی ایک طالبہ بس سے گر کر جاں بحق ہو گئی۔ یہ واقعہ اُس وقت پیش آیا جب طلبہ پکنک کے لیے پتنی ٹاپ جا رہے تھے۔

حکام کے مطابق متوفیہ کی شناخت انجلی چودھری کے طور پر ہوئی ہے، جو کالج کی چوتھے سمسٹر کی طالبہ تھی۔ حادثہ جمعرات کی صبح ادھم پور کے قریب اُس وقت پیش آیا جب وہ چلتی بس سے گر گئی۔

پولیس نے واقعے کا نوٹس لیتے ہوئے کیس درج کر لیا ہے اور حادثے کی وجوہات جاننے کے لیے تحقیقات شروع کر دی گئی ہیں۔

دریں اثنا، وزیر برائے اعلیٰ تعلیم سکینہ ایتو نے واقعے پر گہرے دکھ اور افسوس کا اظہار کرتے ہوئے سوگوار خاندان اور کالج برادری سے تعزیت کی۔ انہوں نے متعلقہ حکام کو ہدایت دی کہ متاثرہ خاندان کو ہر ممکن مدد فراہم کی جائے۔

محکمہ اعلیٰ تعلیم جموں و کشمیر نے بھی طالبہ کی اچانک موت پر افسوس کا اظہار کرتے ہوئے کہا کہ اس سانحہ نے پوری تعلیمی برادری کو صدمے میں مبتلا کر دیا ہے۔

کمشنر سکریٹری، ڈائریکٹر کالجز، اساتذہ اور طلبہ سمیت تعلیمی حلقوں نے بھی غمزدہ خاندان سے ہمدردی کا اظہار کیا ہے ۔

ہندوستھان سماچار

---------------

ہندوستان سماچار / محمد اصغر