اے ایم یو میں خواتین کی سیاسی شرکت پر سیمینار منعقد، بامعنی نمائندگی پر زور

علی گڑھ، 13 اپریل (ہ س)۔ علی گڑھ مسلم یونیورسٹی کے کینیڈی آڈیٹوریم میں ”سیاست میں خواتین کی شرکت: منصفانہ نمائندگی کی جانب“ موضوع پر ایک سیمینار منعقد کیا گیا، جس میں ماہرین، اسکالرز اور طلبہ و طالبات نے شرکت کی اور صنفی مساوات، حکمرانی اور جمہوری شمولیت کے موضوعات پر بامعنی تبادلہ خیال کیا۔ مہمانِ خصوصی وائس چانسلر پروفیسر نعیمہ خاتون نے ”ناری شکتی وندن ایکٹ“ کو صنفی مساوات کی جانب ایک اہم پیش رفت قرار دیتے ہوئے کہا کہ فیصلہ سازی کے عمل میں خواتین کی شمولیت، چاہے بتدریج ہی کیوں نہ ہو، معاشرتی سطح پر بڑی تبدیلیاں لا سکتی ہے۔

انہوں نے کہا کہ حقیقی اختیار دہی ایسے سازگار ماحول کی فراہمی میں مضمر ہے جہاں خواتین اعتماد کے ساتھ قیادت کر سکیں، پالیسی سازی میں حصہ لے سکیں اور قومی ترقی کے عمل میں فعال کردار ادا کریں۔ انہوں نے اس بات پر زور دیا کہ جامع اور منصفانہ شرکت ایک انصاف پسند، ترقی پسند اور روشن خیال معاشرے کی بنیاد ہے۔ پرو وائس چانسلر پروفیسر محمد محسن خان نے اپنے خطاب میں کہا کہ خواتین کو بااختیار بنانے کے لیے صرف علامتی شمولیت کافی نہیں، بلکہ تعلیم، مالی خودمختاری اور مضبوط ادارہ جاتی نظام کی ضرورت ہے تاکہ خواتین مؤثر طور پر حکمرانی کے نظام میں حصہ لے سکیں۔

صدارتی خطاب میں پروفیسر آذرمی دخت صفوی نے کہا کہ خواتین کی شرکت انصاف اور جمہوریت کی مضبوطی کے لیے ناگزیر ہے، اور اس کے لیے ڈھانچہ جاتی اصلاحات کے ساتھ ساتھ سماجی رویوں میں تبدیلی بھی ضروری ہے۔اس موقع پر سینٹر فار ویمنس اسٹڈیز کی ڈائریکٹر پروفیسر عذرا موسوی نے ایک باضابطہ قرارداد پیش کی، جس میں مضبوط ادارہ جاتی حمایت، قیادت کے فروغ، سماجی و ثقافتی رکاوٹوں کے خاتمے اور صنفی مساوات پر مبنی پالیسیوں کے فروغ پر زور دیا گیا۔پروگرام کی نظامت شعبہ انگریزی کی پروفیسر اور نوڈل آفیسر پروفیسر وبھا شرما نے کی۔

ہندوستھان سماچار

---------------

ہندوستان سماچار / سید کامران علی گڑھ