مہاتما جیوتی با پھولے کے یوم پیدائش پر یادگاری پروگرام کا انعقاد

علی گڑھ، 13 اپریل (ہ س)۔ علی گڑھ مسلم یونیورسٹی کے ڈاکٹر امبیڈکر چیئر آف لیگل اسٹڈیز اینڈ ریسرچ نے مہاتما جیوتی با پھولے کے یومِ پیدائش کے موقع پر کانفرنس ہال میں ایک یادگاری علمی پروگرام کا اہتمام کیا۔ کلیدی خطبہ پیش کرتے ہوئے شعبہ قانون کے پروفیسر سید علی نواز زیدی نے سماجی انصاف، تعلیم اور مساوات کے میدان میں مہاتما پھولے کے افکار کی پائیدار اہمیت کو اجاگر کیا۔ انہوں نے کہا کہ پھولے کا وژن آج بھی قانونی اور سماجی مباحث میں رہنمائی فراہم کرتا ہے اور ہندوستان کی آئینی اقدار سے گہری ہم آہنگی رکھتا ہے۔

صدارتی خطاب میں چیئر پروفیسر اور انچارج پروفیسر ظفر احمد خان نے موجودہ دور میں مہاتما پھولے جیسے عظیم سماجی مصلحین کی خدمات کو اجاگر کرنے کی ضرورت پر زور دیا۔ انہوں نے معاشرے میں انصاف، مساوات اور شمولیت کے اصولوں کو فروغ دینے کے لیے مسلسل علمی مکالمے اور تحقیق کی اہمیت پر بھی روشنی ڈالی۔پروگرام میں ریسرچ اسکالرز اور طلبہ نے بھرپور شرکت کی اور مباحثے میں سنجیدگی کے ساتھ حصہ لیا۔ پروگرام کی نظامت ڈاکٹرل فیلو مسٹر کامران رئیس نے کی۔

ہندوستھان سماچار

---------------

ہندوستان سماچار / سید کامران علی گڑھ