نئی دہلی، 13 اپریل (یو این آئی) دہلی کی وزیر اعلی ریکھا گپتا نے پیر کو کہا کہ دارالحکومت میں گھریلو اور تجارتی ایل پی جی کی فراہمی مکمل طور پر مستحکم، مناسب اور قابو میں ہے۔ دہلی میں ایل پی جی یا کسی دوسرے ایندھن کی کمی نہیں ہے۔ انہوں نے عوام سے اپیل کی ہے کہ وہ کسی بھی قسم کی افواہوں یا گھبراہٹ کا شکار نہ ہوں اور تحمل برقرار رکھیں۔

ایک بیان میں گھریلو ایل پی جی کی صورتحال کے بارے میں تفصیلات دیتے ہوئے وزیر اعلی نے کہا کہ 12 اپریل کو 111,766 بکنگ ریکارڈ کی گئیں، جبکہ تینوں آئل مارکیٹنگ کمپنیوں (او ایم سی) نے مل کر 130,094 سلنڈر ڈیلیور کیے، جو کہ بکنگ سے نمایاں طور پر زیادہ ہیں۔ اس سے یہ واضح ہوتا ہے کہ زیر التواءبکنگ کو تیزی سے کلیئر کیا جا رہا ہے اور سپلائی چین مضبوط ہے۔ ترسیل کا اوسط وقت اس وقت 3.87 دن ہے، جو پہلے کے 4.24 دن سے کم ہے، جس سے صارفین کو بروقت گھر گھر ترسیل کو یقینی بنایا جاتا ہے۔

انہوں نے بتایا کہ دہلی کو روزانہ 6,480 تجارتی ایل پی جی سلنڈر مختص کیے گئے ہیں۔ اس کے مقابلے میں، پچھلے ایک ہفتے میں اوسط یومیہ کھپت صرف 4,268 سلنڈر رہی ہے، جس میں پانچ کلوگرام فری ٹریڈ ایل پی جی سلنڈر کی کھپت بھی شامل ہے۔ یہ واضح طور پر ظاہر کرتا ہے کہ اس وقت دستیابی مانگ سے زیادہ ہے۔

وزیر اعلی نے تمام تجارتی ایل پی جی صارفین، خاص طور پر پانچ کلوگرام سلنڈر استعمال کرنے والوں سے اپیل کی ہے کہ وہ پرسکون رہیں اور کسی بھی غیر ضروری پریشانی یا ذخیرہ اندوزی سے گریز کریں۔ پورے شہر میں تقسیم کا نظام آسانی سے کام کر رہا ہے اور کافی اسٹاک دستیاب ہیں۔ صارفین کی سہولت کے لیے، اگر کسی تجارتی صارف کو ایل پی جی سلنڈر حاصل کرنے میں کوئی دشواری پیش آتی ہے، تو وہ دہلی حکومت کے محکمہ خوراک و شہری رسد کے کنٹرول روم سے 011-23379836 یا 8383824659 پر رابطہ کر سکتے ہیں۔ یہ سہولت ہفتے کے تمام دنوں میں صبح 9 بجے سے شام 7 بجے تک دستیاب ہے۔

وزیر اعلی نے کہا کہ حکومت نے صارفین اور اداروں کی حوصلہ افزائی کی ہے کہ وہ جہاں کہیں بھی پائپڈ نیچرل گیس (پی این جی) دستیاب ہو اسے استعمال کریں کیونکہ یہ قابل اعتماد اور مسلسل ایندھن کی فراہمی فراہم کرتی ہے۔ بڑے صارفین جیسے اسپتالوں اور تعلیمی اداروں کو جلد از جلد پی این جی اپنانے کا مشورہ دیا گیا ہے، جس سے سپلائی کی کارکردگی اورحفاظت میں اضافہ ہوگا۔

انہوں نے مزید کہا کہ صارفین کی حوصلہ افزائی کی گئی ہے کہ وہ برقی یا انڈکشن کوکنگ کو درمیانی اور طویل مدتی حل کے طور پر اپنانے کے آپشن پر غور کریں تاکہ ایندھن کی بلاتعطل فراہمی کو یقینی بنایا جا سکے۔ وزیر اعلی نے یقین دلایا کہ حکومت روزانہ کی بنیاد پر صورتحال پر گہری نظر رکھے ہوئے ہے اور دارالحکومت میں ایل پی جی کی بلاتعطل فراہمی کو یقینی بنانے کے لیے پوری طرح پرعزم ہے۔

---------------

ہندوستان سماچار / عبدالسلام صدیقی