اے ایم یو میں طلبہ کے لئے قانونی آگہی ورکشاپ کا اہتمام

علی گڑھ، 13 اپریل (ہ س)۔ کلچرل ایجوکیشن سینٹر (سی ای سی) کے تحت کلب فار شارٹ ایوننگ کورسز نے طلبہ کو بنیادی قانونی، ڈیجیٹل اور شائستگی سے متعلق امور سے آگہی کے لئے ”سیویٹاس: سِوِک لٹریسی 101“ کے عنوان سے ایک ورکشاپ منعقد کی۔ پروگرام میں شعبہ ارضیات کے پروفیسر شمیم احمد نے بطور مہمانِ خصوصی شرکت کی، جبکہ رئیس احمد، چیف انجینئر اور اسٹیٹک مجسٹریٹ، نگر نگم مرادآباد، مہمانِ اعزازی کے طور پر موجود رہے۔

ورکشاپ میں فیکلٹی آف لاء کے پروفیسر سید علی نواز زیدی نے بنیادی حقوق و فرائض، جرائم کی روک تھام اور ایف آئی آر کے طریقہ کار پر گفتگو کی۔ ڈاکٹر محمد اسلم نے سائبر قوانین اور سوشل میڈیا کے غلط استعمال پر روشنی ڈالی، جبکہ ڈاکٹر گورو نے حق اطلاعات (آر ٹی آئی)، رازداری کے مسائل اور صارفین کی آگہی سے متعلق موضوعات پر خطاب کیا۔

سی ای سی کے کوآرڈینیٹر پروفیسر محمد رضوان خان نے زور دیتے ہوئے کہا کہ اس طرح کے مہارت پر مبنی اور آگہی فراہم کرنے والے پروگرام باشعور، ذمہ دار اور سماجی طور پر حساس شہریوں کی تشکیل میں اہم کردار ادا کرتے ہیں۔ انہوں نے کہا کہ تیزی سے بدلتے ڈیجیٹل دور اور پیچیدہ سماجی و قانونی چیلنجوں کے تناظر میں طلبہ کے لیے ضروری ہے کہ وہ نہ صرف اپنے تعلیمی مضامین میں مہارت حاصل کریں بلکہ آئینی اقدار، قانونی حقوق اور اخلاقی ذمہ داریوں سے بھی واقف ہوں۔

ہندوستھان سماچار

---------------

ہندوستان سماچار / سید کامران علی گڑھ