ویرودھونگر، 12 اپریل (ہ س)۔ جیسے جیسے تمل ناڈو اسمبلی انتخابات قریب آرہے ہیں، ریاست میں سیاسی سرگرمیاں تیز ہوگئی ہیں۔ تمام بڑی سیاسی جماعتوں نے اپنے اپنے امیدواروں کی حمایت میں بھرپور مہم شروع کر دی ہے۔ بھارتیہ جنتا پارٹی (بی جے پی) کے قومی صدر نتن نوین اتوار کو تمل ناڈو کے دو روزہ دورے پر پہنچے، جس نے قومی جمہوری اتحاد (این ڈی اے) کی انتخابی مہم کو ایک نئی تحریک دی۔

بی جے پی صدر نتن نوین قومی جمہوری اتحاد کے امیدواروں کی حمایت میں 12 اور 13 اپریل کو ریاست بھر کے مختلف اسمبلی حلقوں میں روڈ شو اور عوامی جلسے کریں گے۔ پارٹی ذرائع کے مطابق یہ دورہ انتخابی حکمت عملی کے لیے انتہائی اہم سمجھا جا رہا ہے اور اس سے اتحاد کے لیے سازگار ماحول پیدا کرنے میں مدد ملے گی۔

قبل ازیں مدورائی ہوائی اڈے پر پہنچنے پر پارٹی عہدیداروں اور کارکنوں نے ان کا پرتپاک استقبال کیا۔ اس کے بعد وہ ویرودھونگر ضلع کے ستور اسمبلی حلقہ کی طرف روانہ ہوئے، جہاں انہوں نے بی جے پی امیدوار نینار ناگیندرن کی حمایت میں روڈ شو کیا۔ روڈ شو میں پارٹی کارکنوں اور حامیوں کی بڑی تعداد نے شرکت کی۔

ان کے ساتھ اداکار اور بی جے پی لیڈر سرتھ کمار بھی تھے، جن کی موجودگی نے تقریب کے جوش و خروش میں اضافہ کیا۔

اپنے دورے کے دوران، نتن نوین مدورائی ساو¿تھ اور کندرواکوٹئی اسمبلی حلقوں میں روڈ شو بھی کریں گے، جہاں وہ این ڈی اے کے امیدواروں کے حق میں عوامی حمایت حاصل کرنے کی کوشش کریں گے۔

قابل ذکر ہے کہ تمل ناڈو اسمبلی انتخابات 23 اپریل کو ہونے والے ہیں، ووٹوں کی گنتی 4 مئی کو ہوگی اور اسی دن نتائج کا اعلان کیا جائے گا۔ بی جے پی آل انڈیا انا دراوڑ منیترا کزگم (اے آئی اے ڈی ایم کے) کے ساتھ اتحاد میں 27 سیٹوں پر الیکشن لڑ رہی ہے۔

سیاسی تجزیہ کاروں کا خیال ہے کہ نتن نوین کا یہ دورہ بی جے پی اور اے آئی اے ڈی ایم کے اتحاد کے حق میں ماحول بنانے اور زیادہ سے زیادہ ووٹ حاصل کرنے میں فیصلہ کن رول ادا کر سکتا ہے۔

---------------

ہندوستان سماچار / عبدالسلام صدیقی