نئی دہلی، 11 اپریل (ہ س)۔ وزیر اعظم نریندر مودی نے مہاتما جیوتی راؤ پھولے کو ان کی یوم پیدائش پر خراج عقیدت پیش کیا اور ان کی 200 ویں یوم پیدائش کے موقع پر سال بھر جاری رہنے والی تقریبات کا باقاعدہ افتتاح کیا۔ مہاتما پھولے کو ایک بصیرت والے سماجی مصلح کے طور پر بیان کرتے ہوئے وزیر اعظم نے کہا کہ انہوں نے اپنی زندگی مساوات، انصاف اور تعلیم کے نظریات کے لیے وقف کر دی۔

ہفتہ کے روز، سوشل میڈیا پلیٹ فارم ایکس وزیر اعظم نے لکھا کہ مہاتما پھولے خواتین اور پسماندہ لوگوں کے حقوق کے ایک مضبوط وکیل تھے، اور انہوں نے تعلیم کو بااختیار بنانے کے لیے سب سے مؤثر ذریعہ قرار دیا۔ آج بھی پھولے کے نظریات معاشرے کی ترقی کے لیے رہنمائی کی روشنی کا کام کر رہے ہیں۔

ہندی، گجراتی اور مراٹھی سمیت مختلف زبانوں میں الگ الگ ٹویٹ کی ایک سیریز میں وزیر اعظم نے اس بات کا اعادہ کیا کہ مہاتما جیوتی راؤ مساوات، انصاف اور تعلیم کے نظریات کے لیے وقف ایک بصیرت والے سماجی مصلح تھے۔ انہوں نے خواتین اور پسماندہ افراد کے حقوق کی حمایت کی اور تعلیم کو بااختیار بنانے کے ایک ذریعہ کے طور پر استعمال کیا۔ اس سال، ہم ان کی 200ویں سالگرہ کے موقع پر تقریبات کا آغاز کر رہے ہیں۔ ان کے خیالات و نظریات ہماری سماجی ترقی کے حصول میں ہماری رہنمائی کرتے رہیں۔

قابل ذکر ہے کہ مہاتما جیوتی راؤ پھولے 'مہاتما پھولے' کے نام سے مشہور ہیں۔ وہ 19ویں صدی کے ہندوستان کے صف اول کے سماجی اصلاح کاروں میں سے ایک تھے۔ انہوں نے اپنی زندگی سماجی اور معاشی ناہمواریوں کے خاتمے کے لیے وقف کر دی۔ 1873 میں، انہوں نے 'ستیہ شودھک سماج' (سچائی کے متلاشیوں کی سوسائٹی) کی بنیاد رکھی، ایک ایسی تنظیم جس کا مقصد استحصال کو روکنا اور متاثرین کو امتیازی سلوک سے آزاد کرنا تھا۔ انہوں نے 1876 سے 1882 تک پونے میونسپلٹی کے ممبر کے طور پر خدمات انجام دیں، اور 1888 میں، غریبوں اور پسماندہ لوگوں کی نجات کے لیے ان کی شراکت کے اعتراف میں، انہیں 'مہاتما' اور 'انڈیا کے بکر ٹی واشنگٹن' کے خطابات سے نوازا گیا۔

مہاتما جیوتی راؤ پھولے کا 12 فٹ اونچا کانسے کا مجسمہ — جو پارلیمنٹ ہاؤس کمپلیکس کے اندر واقع ہے، یہ مجسمہ رام وی سوتار نے بنایا تھا، اور اس کی نقاب کشائی 3 دسمبر 2003 کو سابق وزیر اعظم اٹل بہاری واجپائی نے کی تھی۔

ہندوستھان سماچار

---------------

ہندوستان سماچار / عبدالواحد