نئی دہلی، 11 اپریل (ہ س)۔ انفورسمنٹ ڈائریکٹوریٹ (ای ڈی) نے نیشنل پروجیکٹس کنسٹرکشن کارپوریشن لمیٹڈ (این پی سی سی) کے تقریباً 60.30 کروڑ روپے کے معاہدوں سے متعلق مبینہ منی لانڈرنگ اور رشوت ستانی کے معاملے میں کئی لوگوں کے خلاف مقدمہ درج کیا ہے، جس کی تحقیقات ابھی جاری ہے۔ ہفتہ کو ایک بیان میں، ای ڈی نے کہا کہ انفورسمنٹ ڈائریکٹوریٹ کے گوہاٹی زونل آفس نے آسام کی ایک خصوصی پی ایم ایل اے عدالت میں این پی سی سی کے سابق عہدیداروں اور ٹھیکیداروں سمیت متعدد افراد اور اداروں کے خلاف استغاثہ کی شکایت درج کرائی ہے۔ مرکزی تفتیشی ایجنسی نے کہا کہ یہ معاملہ ہندوستان-بنگلہ دیش سرحد پر انفراسٹرکچر سے متعلق معاہدوں میں مبینہ رشوت ستانی سے متعلق منی لانڈرنگ سے متعلق ہے۔

ای ڈی نے کہا کہ یہ معاملہ سنٹرل بیورو آف انویسٹی گیشن (سی بی آئی) کی ایک ایف آئی آر سے منسلک ہے جس میں سرحدی چوکیوں کے لیے تقریباً 60.30 کروڑ روپے کے ٹھیکے دینے اور پروسیسنگ میں رقم کی غیر قانونی وصولی کا الزام لگایا گیا ہے۔

مرکزی تحقیقاتی ایجنسی نے کہا کہ انفورسمنٹ ڈائریکٹوریٹ کے گوہاٹی زونل آفس نے پی ایم ایل اے 2002 کے تحت گوہاٹی میں خصوصی عدالت (پی ایم ایل اے) کے سامنے راکیش موہن کوتوال، این پی سی سی، سلچر کے ریٹائرڈ زونل مینیجر، لطیفل پاشا این پی سی سی جلپائی گوڑی کے پراجیکٹ انچارج ،شری گوتم کنسٹرکشن کمپنی لمیٹڈ کے ڈائریکٹر انیش بیداور ونود سنگھی اور کمپنی کے دیگر افسران کے خلاف استغاثہ کی شکایت درج کی ہے۔

تحقیقاتی ایجنسی نے بتایا کہ یہ معاملہ رشوت ستانی کے ایک کیس سے متعلق ہے جس میں این پی سی سی لمیٹڈ (بی ایس ایف کی جانب سے) نے شری گوتم کنسٹرکشن کمپنی لمیٹڈ کو ہندوستان-بنگلہ دیش سرحد کے ساتھ نو سرحدی چوکیوں (گروپ سی اور ڈی) کی تعمیر کے لیے تقریباً 60.30 کروڑ کے ٹھیکے دیے تھے۔ ای ڈی کی ابتدائی تحقیقات سے یہ بات سامنے آئی ہے کہ مبینہ طور پر زیر التواءبلوں کو کلیئر کرنے کے لیے رشوت طلب کی گئی تھی اور اسے حوالا کے ذریعے پہنچایا گیا تھا۔ بعد میں چھاپوں کے نتیجے میں کچھ فنڈز کی وصولی ہوئی۔ ای ڈی نے کہا کہ جرم کی رقم ملزمین میں تقسیم کی گئی تھی، اور پورے نیٹ ورک کی مزید تحقیقات جاری ہے۔

---------------

ہندوستان سماچار / عبدالسلام صدیقی