نئی دہلی، 10 اپریل (ہ س): مغربی ایشیا میں جاری بحران کے درمیان، قطر نے ہندوستان کو ایک قابل اعتماد توانائی فراہم کرنے والا رہنے کے اپنے عزم کا اعادہ کیا ہے۔ قطر کے وزیر توانائی سعد شیریدہ الکعبی نے دوحہ میں پیٹرولیم اور قدرتی گیس کے مرکزی وزیر ہردیپ سنگھ پوری کے ساتھ بات چیت کے دوران یہ یقین دہانی کرائی۔ دونوں فریقوں نے جاری کشیدگی کے درمیان عالمی منڈیوں میں استحکام برقرار رکھنے پر زور دیا۔

ہردیپ سنگھ پوری 9 سے 10 اپریل تک قطر کے دو روزہ دورے پر ہیں۔ اس دورے کے دوران، انہوں نے خطے میں تنازعات کے پھیلنے کے بعد قطری قیادت کو وزیر اعظم نریندر مودی کا یکجہتی کا پیغام پہنچایا۔ پوری نے قطر کے امیر شیخ تمیم بن حمد الثانی اور وزیر اعظم کو وزیر اعظم مودی کی نیک خواہشات اور حمایت سے آگاہ کیا۔ دونوں وزراءنے دونوں ممالک کے درمیان سٹریٹجک تعلقات کے تمام پہلوو¿ں پر تبادلہ خیال کیا، جن میں اعلیٰ سطح کی شمولیت، تجارت، سرمایہ کاری، توانائی، ثقافت اور عوام کے درمیان تعلقات شامل ہیں۔

انہوں نے خطہ میں امن اور استحکام کی جلد واپسی اور ہندوستان اور قطر کے درمیان دو طرفہ تعلقات کو مزید مضبوط بنانے کی امید ظاہر کی۔ مزید برآں، دونوں فریقوں نے 8 اپریل کو اعلان کردہ دو ہفتے کی جنگ بندی کا خیرمقدم کیا اور عالمی توانائی کی فراہمی میں رکاوٹوں کو فوری طور پر ختم کرنے کی ضرورت پر زور دیا۔ انہوں نے سپلائی چین کو برقرار رکھنے کے لیے بلاتعطل نیویگیشن کی اہمیت پر بھی زور دیا۔

مرکزی پیٹرولیم اور قدرتی گیس کے وزیر ہردیپ سنگھ پوری کا قطر کا دورہ ایسے وقت میں آیا ہے جب ہندوستان عالمی کشیدگی کے درمیان اپنی توانائی کی حفاظت کو یقینی بنانے کی کوشش کر رہا ہے۔ قطر ہندوستان کا ایل این جی اور ایل پی جی سپلائی کا سب سے بڑا ذریعہ ہے، جس کا بالترتیب 45فیصد اور 20فیصد حصہ ہے۔

---------------

ہندوستان سماچار / عبدالسلام صدیقی