کولکاتا،یکم اپریل (ہ س)۔ کولکاتا میں ریاست کے چیف الیکٹورل آفیسر (سی ای او) کے دفتر کے باہر کشیدگی، جو منگل سے شروع ہوئی، دیر رات تک جاری رہی۔ اگرچہ بدھ کی صبح وہاں کوئی بھیڑ نظر نہیں آئی، لیکن پورا علاقہ پولیس کی سخت نگرانی میں رہا۔ سی ای او کے دفتر کے باہر مختلف مقامات پر رکاوٹیں کھڑی کر دی گئی تھیں اور سکیورٹی کے سخت انتظامات کیے گئے تھے۔

بدھ کو، ریاست کے سی ای او کے دفتر نے ٹویٹر (ایکس) پر ایک ویڈیو پوسٹ کیا۔ پوسٹ میں دعویٰ کیا گیا ہے کہ بیلگھاٹہ کے ایک کونسلر کے ساتھ کچھ لوگ منگل کی رات دیر گئے اس مقام پر پہنچے اور نعرے لگانے لگے۔ کمیشن نے واضح کیا کہ ایسی سماج دشمن سرگرمیوں کو کسی صورت برداشت نہیں کیا جائے گا اور آزادانہ اور منصفانہ انتخابات کو یقینی بنانے کے لیے سخت کارروائی کی جائے گی۔

ریاست کے چیف الیکٹورل آفیسر منوج اگروال نے منگل کو کہا تھا کہ اگر پولیس نے سی ای او کے دفتر کے سامنے ہنگامہ میں کارروائی نہیں کی تو الیکشن کمیشن مداخلت کرے گا۔ انہوں نے وضاحت کی کہ اجے نندا کے ذریعہ نافذ کردہ دفعہ 163 کو اس علاقہ میں نافذ کیا گیا ہے۔ اس لیے کسی بھی قسم کی گڑبڑ کی صورت میں پولیس کو قانون کے مطابق کارروائی کرنی ہوگی۔

قابل ذکر ہے کہ منگل کی دوپہر، ترنمول کانگریس کے کئی حامی اچانک اسٹرینڈ روڈ پر نئے سی ای او کے دفتر کے سامنے پہنچ گئے۔ انہوں نے الزام لگایا کہ کچھ لوگ فارم 6 سے بھرے بیگ لے کر سی ای او آفس میں جمع کرانے آئے تھے۔ اس الزام کے خلاف بی ایل اوز نے احتجاج شروع کر دیا۔ اسی دوران بی جے پی کارکن بھی پہنچ گئے اور دونوں فریقوں کے درمیان نعرے بازی شروع ہوگئی جس سے علاقے میں کشیدگی پیدا ہوگئی۔

ذرائع کے مطابق کولکاتا پولیس کمشنر اجے نندا نے منگل کی رات ذاتی طور پر سی ای او کے دفتر کا دورہ کیا اور حکام کے ساتھ امن و امان کی صورتحال پر تبادلہ خیال کیا۔ الیکشن کمیشن نے واضح کیا ہے کہ پرامن اور منصفانہ انتخابی عمل کو یقینی بنانے کے لیے کسی بھی قسم کی بدنظمی سے سختی سے نمٹا جائے گا۔

---------------

ہندوستان سماچار / عبدالسلام صدیقی