کولکاتا، 07 مارچ (ہ س)۔ انتخابی کمیشن کی فل بنچ کے اتوار کی رات کولکاتا آمد سے ایک دن قبل مغربی بنگال کی وزیر اعلیٰ ممتا بنرجی کی رہائش والے وارڈ میں چیف الیکشن کمشنر گیانیش کمار پر طنزکرنے والا ایک پوسٹر لگایا گیا ہے۔

چیف الیکشن کمشنر گیانیش کمار کی سربراہی میں الیکشن کمیشن کی فل بنچ اگلے دو دنوں کے مصروف شیڈول کے ساتھ کولکاتا پہنچے گی۔ اس دوران کمیشن ”منطقی تضاد“ کے زمرے میں نشان زد ووٹر دستاویزات سے متعلق عدالتی معاملات کا جائزہ لے گا اور اس سال ہونے والے اہم اسمبلی انتخابات کی تیاریوں کا بھی جائزہ لے گا۔

ترنمول کانگریس کی مقامی یونٹ نے ان پوسٹروں کو لگانے کی ذمہ داری قبول کی ہے۔ پوسٹر ایک کارٹون کے طور پر بنائے گئے ہیں جس میں چیف الیکشن کمشنر کو زمین پر لیٹے ہوئے اور معافی مانگتے ہوئے دکھایا گیا ہے۔ کارٹون میں ایک عورت کامکہان کے چہرے پر پڑتے ہوئے دکھایا گیا ہے ، حالانکہ عورت کا چہرہ نہیں دکھایا گیا ہے۔ اس مکے پر لفظ شیرنی لکھا ہوا ہے۔ تصویر میں ایک ساڑی بھی دکھائی گئی ہے جس کی سفید بنیاد اور ہلکے نیلے رنگ کا بارڈر ہے، جسے وزیر اعلیٰ ممتا بنرجی کی پہچان سمجھا جاتا ہے۔ پوسٹر میں ایک جج کو اپنی کرسی پر بیٹھے ہوئے بھی دکھایا گیا ہے۔

دریں اثنا، مغربی بنگال کی بھارتیہ جنتا پارٹی (بی جے پی) نے پوسٹر کو ”خراب ذہنیت اور انتہائی توہین آمیز اظہارآزادی“ قرار دیا ہے۔

کولکاتا میونسپل کارپوریشن میں بی جے پی کے کونسلر سجل گھوش نے کہا کہ الیکشن کمیشن ہندوستانی جمہوریت کا ایک اہم ادارہ ہے اور اس کے سربراہ کی اس طرح کی بے عزتی ناقابل قبول ہے۔ انہوں نے کہا کہ یہخصوصی جامع نظرثانی(ایس آئی آر) مہم پر ترنمول کانگریس کی بے چینی کو بھی ظاہر کرتا ہے، جس کی وجہ سے لاکھوں مبینہ طور پر فرضی ووٹروں کو حذف کیاگیا ہے۔

سیاسی مبصرین کا خیال ہے کہ الیکشن کمیشن کے فل بنچ کے دورے سے عین قبل یہ پوسٹرز جان بوجھ کر عوامی مقامات پر لگائے گئے ہیں جہاں سے روزانہ بڑی تعداد میں لوگ گزرتے ہیں۔

ہندوستھان سماچار

ہندوستان سماچار / محمد شہزاد