نئی دہلی، 30 مارچ (ہ س)۔

وزیر اعظم نریندر مودی 31 مارچ 2026 کو اپنی آبائی ریاست گجرات کے ایک دن کے دورے پر ہوں گے۔ اس دورے کے دوران وہ روحانیت، صنعت اور بنیادی ڈھانچے سے متعلق کئی اہم منصوبوں کا افتتاح اور سنگ بنیاد رکھیں گے۔

وزیر اعظم کے دفتر کے مطابق، اس دورے کے دوران، وزیر اعظم ایک سیمی کنڈکٹر پلانٹ اور 20,000 کروڑ روپے سے زیادہ مالیت کے مختلف ترقیاتی منصوبوں کا افتتاح کریں گے۔

وزیر اعظم کے دورے کے شروعات صبح 10 بجے گاندھی نگر واقع کوبا تیرتھ سے ہوگی جہاں وہ مہاویر جینتی کے موقع پر سمراٹ سمپرتی سنگرہالیہ کا افتتاح کریں گے۔ یہ میوزیم جین مت کے عظیم سرپرست شہنشاہ سمپرتی کے لیے وقف ہے۔ سات گیلریوں میں پھیلے ہوئے میوزیم میں 2,000 سے زیادہ نادر نمونے، قدیم مخطوطات اور پتھر اور دھاتی مجسمے رکھے گئے ہیں۔ جدید ڈیجیٹل ٹیکنالوجی کے ذریعے میوزیم جین مت کی ترقی کے سفر کو پیش کرے گا۔

وزیر اعظم اس کے بعد دوپہر 12:45 بجے احمد آباد کے سانندجی آئی ڈی سی پہنچیں گے، جہاں وہ کینس سیمی کان پلانٹ کا افتتاح کریں گے۔ مائیکرون کے بعد، یہ ہندوستان میں تجارتی پیداوار شروع کرنے والا دوسرا سیمی کنڈکٹر یونٹ ہوگا۔ ایڈوانسڈ انٹیلیجنٹ پاور ماڈیول (آئی پی ایم) یہاں تیار کیے جائیں گے، جو آٹوموٹیو اور صنعتی شعبوں میں استعمال ہوں گے۔ اس کی پیداواری صلاحیت 6.33 ملین یونٹ یومیہ تک ہوگی۔

وزیر اعظم 20,000 کروڑ روپے سے زیادہ کے کئی پروجیکٹوں کا سنگ بنیاد بھی رکھیں گے۔ ان میں بجلی، ریلوے، روڈ ٹرانسپورٹ، صحت، شہری ترقی، قبائلی اور دیہی ترقی سے متعلق اسکیمیں شامل ہیں۔ احمد آباد-ڈھولیرا ایکسپریس وے کا بھی افتتاح کیا جائے گا، جبکہ گاندھی نگر-کوبا-ایئرپورٹ روڈ پر نئے فلائی اوور کا سنگ بنیاد رکھا جائے گا۔ سولر پاور ٹرانسمیشن سسٹم کو بھی وقف کیا جائے گا، جو قابل تجدید توانائی کے شعبے میں ایک اہم قدم ہے۔

ریلوے کے شعبے میں کنلس-جام نگر اور راجکوٹ-کنلس ریلوے لائنوں کو ڈبل کرنے کا کام قوم کو وقف کیا جائے گا۔

وزیر اعظم احمد آباد کے ویجل پور میں ایک ہاسٹل کا افتتاح کریں گے جو قبائلی طلباءکو اعلیٰ تعلیم کے لیے بہتر سہولیات فراہم کرے گا۔ یہ دورہ گجرات کی صنعتی ترقی کے ساتھ ساتھ اس کی سماجی اور ثقافتی بنیاد کو بھی مضبوط کرے گا۔

ہندوستھان سماچار

ہندوستان سماچار / عطاءاللہ