تہران، 29 مارچ (ہ س)۔ ایران اور امریکہ کے درمیان بڑھتی ہوئی کشیدگی کے درمیان ایرانی میڈیا نے سخت رخ اختیار کرتے ہوئے امریکہ کو براہِ راست وارننگ دی ہے۔ ’تہران ٹائمز‘ نے اپنے ہہلے صفحہ پ پر ’ویلکم ٹو ہیل‘ (جہنم میں استقبال ہے) کے عنوان کے ساتھ ایک سخت پیغام شائع کیا، جس میں کہا گیا ہے کہ اگر امریکی فوج ایران کی زمین پر قدم رکھتی ہے، تو وہ ’تابوت میں ہی واپس جائے گی۔‘

یہ بیان ایسے وقت میں سامنے آیا ہے جب خبریں ہیں کہ امریکہ مغربی ایشیا میں اپنی فوجی موجودگی بڑھانے پر غور کر رہا ہے۔ رپورٹس کے مطابق، صدر ڈونالڈ ٹرمپ ممکنہ زمینی کارروائی کے متبادلوں پر غور کر رہے ہیں، تاہم اس پر ابھی کوئی حتمی فیصلہ نہیں لیا گیا ہے۔

اگر امریکہ ایران کے پاس موجود حساس جوہری مواد تک رسائی حاصل کرنا چاہتا ہے، تو اسے بڑے پیمانے پر فوجی تعیناتی کرنی پڑ سکتی ہے۔ بتایا جا رہا ہے کہ یہ مواد زمین کے کافی اندر محفوظ مقامات پر رکھا گیا ہے، جس سے کسی بھی آپریشن کو پیچیدہ اور پرخطر بنایا جا سکتا ہے۔

ایران پہلے بھی واضح کر چکا ہے کہ اگر اس پر زمینی حملہ ہوتا ہے، تو وہ سخت جواب دے گا۔ اخبار میں فوجیوں کی تصاویر شائع کر کے یہ پیغام دینے کی کوشش کی گئی ہے کہ ملک کسی بھی ممکنہ حملے کا سامنا کرنے کے لیے پوری طرح تیار ہے۔

اس صورتحال نے خطے میں پہلے سے جاری کشیدگی کو مزید بڑھا دیا ہے، جس سے عالمی سطح پر تشویش بھی بڑھتی جا رہی ہے۔

ہندوستھان سماچار

---------------

ہندوستان سماچار / انظر حسن