نئی دہلی، 29 مارچ (ہ س)۔ شمال-مشرقی دہلی کے دیال پور تھانہ علاقے میں واقع چاند باغ میں آج علی الصبح ایک کثیر المنزلہ مکان میں آگ لگنے سے افرا تفری مچ گئی۔ آگ گراونڈ فلور کی پارکنگ میں کھڑے دو اسکوٹر اور ایک موٹر سائیکل میں لگی، جس کے بعد دھواں تیزی سے پھیل گیا۔ دھوئیں سے گھبرا کر پہلی منزل پر موجود چار لوگوں نے چھلانگ لگا دی، جبکہ فائر فائٹرز نے اوپری منزلوں سے چار دیگر افراد کو محفوظ باہر نکالا۔

محکمہ فائر بریگیڈ کو واقعے کی اطلاع رات قریب 2.30 بجے ملی۔ اطلاع ملتے ہی فائر بریگیڈ کی چار گاڑیاں موقع پر روانہ کر دی گئیں۔ آگ کی سنگینی کو دیکھتے ہوئے قریب 2.56 بجے ’مییک-4‘ قرار دیا گیا، جس کے بعد اضافی گاڑیاں روانہ کی گئیں۔ کل 11 فائر بریگیڈ کی گاڑیاں موقع پر پہنچیں۔

حکام کے مطابق، عمارت گراونڈ پلس پانچ منزلہ ہے اور اس کا رقبہ قریب 50 مربع گز ہے۔ آگ سے اٹھنے والے دھوئیں نے اوپری منزلوں کو اپنی زد میں لے لیا، جس سے لوگ پھنس گئے۔ فائر فائٹرز نے امدادی مہم چلاتے ہوئے دوسری، تیسری اور چوتھی منزل سے چار لوگوں کو محفوظ باہر نکالا۔ وہیں چوتھی منزل سے ایک بچے کو بھی بحفاظت ریسکیو کیا گیا۔

واقعے کے دوران نکہت (22)، راشدہ (50)، سونی (25) اور دو سالہ آصف نے پہلی منزل سے چھلانگ لگا دی۔ تمام کو فوری طور پر جگ پرویش چند اسپتال لے جایا گیا، جہاں ابتدائی طبی امداد کے بعد انہیں چھٹی دے دی گئی۔ وہیں سوید (12)، دروید (10)، عارفہ (28) اور فرح (14) کو فائر فائٹرز نے بحفاظت بچا لیا۔

صبح قریب 6.20 بجے تک فائر بریگیڈ کی تمام گاڑیاں واپس لوٹ گئیں اور آگ پر مکمل طور پر قابو پا لیا گیا۔ موقع پر اے ڈی او دیپک ہڈا کی قیادت میں امدادی کام چلایا گیا۔ فی الحال دیال پور تھانہ پولیس معاملے کی جانچ کر رہی ہے۔ ابتدائی جانچ میں آگ لگنے کی وجہ پارکنگ میں کھڑی گاڑیوں سے متعلق مانی جا رہی ہے۔ اصل وجوہات کا پتہ لگانے کے لیے تفتیش جاری ہے۔

ہندوستھان سماچار

---------------

ہندوستان سماچار / انظر حسن