منامہ، 29 مارچ (ہ س)۔ ایران نے بحرین کے ایک ایلومینیم پلانٹ پر حملہ کیا ہے۔ حملے میں پلانٹ کے دو ملازمین زخمی ہو گئے ہیں۔ اس حملے کی ذمہ داری سپاہ پاسداران انقلاب اسلامی نے لی ہے۔ یہ صنعتی پلانٹ بحرین کی معروف ایلومینیم کمپنی ’ایلومینیم بحرین‘ (البا) کا ہے۔ صنعتی پلانٹ پر ہونے والے حملے نے خطے میں کشیدگی بڑھا دی ہے۔

بحرین نیوز ایجنسی کی رپورٹ کے مطابق، البا نے اتوار کو تصدیق کی کہ اس کی صنعتی تنصیب کو ہفتہ کو ہونے والے حملے میں نشانہ بنایا گیا۔ اس واقعے میں کمپنی کے دو ملازمین کو معمولی چوٹیں آئی ہیں۔ البا نے بیان میں کہا کہ ملازمین کی حفاظت اس کی اولین ترجیح ہے اور زخمی ملازمین کو فوری طبی امداد فراہم کی گئی ہے۔ البا نے کہا کہ فی الحال پلانٹ کو ہونے والے نقصان کا تخمینہ لگایا جا رہا ہے، ساتھ ہی آپریشنز کو معمول پر رکھنے کی کوششیں جاری ہیں۔

دریں اثنا، ایران کی سپاہ پاسداران انقلاب اسلامی نے اس حملے کی ذمہ داری لی ہے۔ ایرانی سرکاری میڈیا آئی آر آئی بی کے مطابق، سپاہ پاسداران انقلاب اسلامی نے دعویٰ کیا کہ اس نے بحرین اور متحدہ عرب امارات میں واقع اہم صنعتی یونٹوں کو نشانہ بنایا۔ سپاہ پاسداران انقلاب اسلامی کے بیان میں کہا گیا کہ اس کی ایرواسپیس اور بحری افواج نے میزائل اور ڈرون کے ذریعے ایک مشترکہ آپریشن کیا۔ اس مہم میں یو اے ای کے ’ایمریٹس گلوبل ایلومینیم‘ اور بحرین کے ’ایلومینیم بحرین‘ (البا) پلانٹ کو نشانہ بنایا گیا۔

سپاہ پاسداران انقلاب اسلامی نے الزام لگایا کہ یہ صنعتی یونٹس امریکی دفاعی اور ایرواسپیس صنعت سے جڑے ہوئے ہیں۔ یہ پلانٹس امریکی فوجی پیداوار کو بالواسطہ طور پر مدد فراہم کرتے ہیں۔ ایران نے کہا کہ یہ حملے اس کے صنعتی ڈھانچے پر ہونے والے مبینہ ”امریکی-اسرائیلی“ حملوں کے جواب میں کیے گئے ہیں۔

ادھر، ایران نے مشرقِ وسطیٰ میں واقع اسرائیلی اور امریکی یونیورسٹیوں پر حملے کرنے کی دھمکی دی ہے۔ یمن کے حوثی باغیوں نے ایران کی حمایت میں اسرائیل پر میزائلوں اور ڈرون سے حملہ کیا ہے۔ ایران نے کہا ہے کہ اسرائیل اور امریکہ ملک پر مسلسل حملے کر رہے ہیں۔ بوشہر صوبے اور خوزستان صوبے میں ہوئے حملے کا ہر حال میں بدلہ لیا جائے گا۔

الجزیرہ چینل کی رپورٹ کے مطابق، امریکہ اور اسرائیل کے بوشہر صوبے میں کیے گئے حملے میں ایک خاندان کے چار افراد مارے گئے۔ دونوں ممالک نے خوزستان صوبے میں پانی کی ایک تنصیب پر حملہ کیا۔ اس کے جواب میں، تہران نے مشرقِ وسطیٰ میں واقع اسرائیلی اور امریکی یونیورسٹیوں پر جوابی حملہ کرنے کی دھمکی دی ہے۔ اس کے علاوہ یمن کے حوثی باغیوں نے اسرائیل پر میزائلوں اور ڈرون سے دوسرا حملہ کیا ہے۔

الجزیرہ کا دعویٰ ہے کہ اسرائیل کے تل ابیب اور امریکی شہروں میں مظاہرین ایران کے خلاف جنگ کی مخالفت کرنے کے لیے ریلیاں نکال رہے ہیں۔ وہیں، لبنان میں لوگ اسرائیل کے حملے میں تین صحافیوں کے مارے جانے کے خلاف بیروت کی سڑکوں پر اتر آئے ہیں۔ ایران کے جوابی حملوں سے اسرائیل اور خلیجی خطے میں جان و مال کا نقصان ہوا ہے۔

ایران کے پریس ٹی وی نے کہا کہ ہفتہ کو حملے میں اسرائیلی ریڈار سینٹر اور ایئرپورٹ کو نشانہ بنایا گیا۔ یہ حملہ سپاہ پاسداران انقلاب اسلامی، ایرانی فوج اور مشرقِ وسطیٰ میں تہران کے حلیفوں نے مشترکہ طور پر کیا۔ ایران نے دعویٰ کیا ہے کہ حملے میں سپاہ پاسداران انقلاب اسلامی نے ایک امریکی ایم کیو 9 ڈرون کو مار گرایا اور ایک ایف-16 لڑاکا طیارے کو بھی نشانہ بنایا۔

ایرانی فوج نے حیفہ بندرگاہ شہر میں اسرائیلی فوجی ایرواسپیس کمپلیکس میں واقع ایک الیکٹرانک جنگ اور ریڈار سینٹر کو نشانہ بنایا۔ اس سینٹر کو اسرائیلی دفاعی ٹیکنالوجی کمپنی چلاتی ہے۔ ساتھ ہی ڈیوڈ بن گوریان ایئرپورٹ پر ایندھن کے ذخیرہ کرنے والے ایک مرکز کو بھی نشانہ بنایا گیا۔

ہندوستھان سماچار

---------------

ہندوستان سماچار / انظر حسن