بھوپال، 26 مارچ (ہ س)۔ مدھیہ پردیش میں مارچ کے مہینے کے آخر میں ایک بار پھر موسم کروٹ لینے جا رہا ہے۔ ریاست میں تیسری بار بارش اور آندھی کا سلسلہ دیکھنے کو ملے گا۔ ویسٹرن ڈسٹربنس کے اثر سے 27، 28 اور 29 مارچ تک کئی علاقوں میں بارش اور تیز ہوائیں چلنے کا امکان ہے۔ اس کا سب سے زیادہ اثر اجین، گوالیار-چمبل اور ساگر ڈویژن میں دیکھنے کو ملے گا۔
تاہم، اس سے پہلے آج جمعرات کو ریاست میں تیز گرمی کا اثر برقرار رہ سکتا ہے۔ خاص طور پر اجین، بھوپال، ساگر اور نرمدا پورم ڈویژن میں درجہ حرارت زیادہ رہنے کے آثار ہیں۔ بدھ کو بھی کئی شہروں میں گرمی کا اثر دیکھنے کو ملا۔ ریاست کے پانچ شہروں میں درجہ حرارت 38 ڈگری سیلسیس کے پار پہنچ گیا۔ بڑے شہروں میں اجین سب سے گرم رہا، جہاں درجہ حرارت 36.5 ڈگری درج کیا گیا۔ جبل پور میں 36.1 ڈگری، اندور میں 36 ڈگری، بھوپال میں 35.8 ڈگری اور گوالیار میں 35.1 ڈگری درجہ حرارت ریکارڈ کیا گیا۔
وہیں، نرمدا پورم ریاست کا سب سے گرم شہر رہا، جہاں پارہ 38.8 ڈگری تک پہنچ گیا۔ اس کے علاوہ رتلام میں 38.6 ڈگری، کھنڈوا میں 38.5 ڈگری، کھرگون اور رائسین میں 38 ڈگری، دھار اور منڈلا میں 36.8 ڈگری، گنا میں 36.5 ڈگری، کھجوراہو میں 36.4 ڈگری اور بیتول میں 36.2 ڈگری درجہ حرارت درج کیا گیا۔
اس سے پہلے مارچ میں دو بار آندھی اور بارش ہو چکی ہے، جس میں ایک سلسلہ مسلسل چار دنوں تک چلا تھا۔ اس دوران 45 سے زیادہ اضلاع میں بارش ہوئی، جبکہ 17 اضلاع میں ژالہ باری درج کی گئی تھی۔ اس خراب موسم سے گیہوں، پپیتا اور کیلے کی فصلوں کو بھاری نقصان پہنچا تھا۔ اب تیسرا سلسلہ 27 مارچ سے شروع ہونے کا امکان ظاہر کیا جا رہا ہے۔
آگے کی بات کریں تو اپریل اور مئی میں ریاست میں تیز گرمی پڑنے کا اندازہ ہے۔ اس دوران گوالیار، چمبل، جبل پور، ریوا، شہڈول اور ساگر ڈویژن میں درجہ حرارت 45 ڈگری سیلسیس کے پار جا سکتا ہے۔ وہیں بھوپال، اندور، اجین اور نرمدا پورم ڈویژن میں بھی گرمی کا اثر تیز رہے گا۔
ہندوستھان سماچار
---------------
ہندوستان سماچار / انظر حسن
