بہار کے بھاگلپور میں نیٹ طالبہ کی مشتبہ موتبھاگلپور، 23 مارچ (ہ س)۔ بھاگلپور میں ایک نیٹ طالبہ نے دوپٹہ سے پھانسی لگا کر خود کشی کر لی۔ واقعہ براری تھانہ علاقہ کے تحت خنجر پور (جھوہا کوٹھی) کے وندھیا واسینی ہاسٹل میں پیش آیا۔ دیر رات جب بغل کے کمرے میں رہنے والی ایک طالبہ نے متوفی کے دروازے پر دستک دی تو کوئی جواب نہیں ملا۔ اس کے بعد طالبہ چلانے لگی ۔ دیگر طالبہ نے شور سن کر مالک مکان کو فون کیا اور اس کے موسیرے بھائی انکش کو اطلاع دی۔انکش ہاسٹل پہنچا اور لاش کو پھندے سے لٹکا ہوا پایا۔ دروازہ ٹوٹا ہوا تھا اور پولیس کو اطلاع دی گئی۔ پولیس نے جائے وقوعہ پر پہنچ کر ہاسٹل مالک اور متوفی کے موسیرے بھائی کی موجودگی میں لاش کو قبضے میں لے لیا۔فارنسک ٹیم کو بھی جائے وقوعہ پر بلایا گیا اور شواہد اکٹھے کئے۔ متوفی کی شناخت ارریہ کی رہنے والی طالبہ سریشتی سنگھ (17) کے طور پر کی گئی ہے۔ متوفی طالبہ اتوار کے روز 4 بجے ہی ہاسٹل میں شفٹ ہوئی تھی۔ اس سے پہلے وہ ایس ایم کالج روڈ پر ایک ہاسٹل میں رہتی تھیں۔ مرمتی کام کے نام پر تمام طالبات کو وہاں سے نکالا جا رہا تھا، جس کی وجہ سے وہ بھی اپنا کمرہ خالی کر کے یہاں شفٹ ہو گئی۔اس کے والد منیش کمار سنگھ، اس کے موسیرے بھائی اور اس کی والدہ بھی اس کی شفٹنگ میں شامل تھیں۔ شفٹنگ کے بعد اس کے والدین دیرشام گھر کے لیے روانہ ہو گئے۔ اس کا موسیرا بھائی بھاگلپور میں پڑھتا ہے۔ جب بیٹی کی موت کی خبر ملی تو اس کے والدین گھر بھی نہیں پہنچے تھے۔ وہ پھر جلال گڑھ سے بھاگلپور کے لیے روانہ ہوگئے۔ دیر رات تک خاندان بھاگلپور پہنچ گیا، جہاں والدین اپنی بیٹی کی موت سے نڈھال تھے۔ براری تھانہ انچارج بٹو کمال نے جائے وقوعہ پر پہنچ کرمتوفی کا موبائل فون ضبط کر لیا۔پولیس تمام پہلوؤں سے تفتیش کر رہی ہے۔ متوفی کے موسیرے بھائی انکش نے بتایا کہ شام کو اسے ہاسٹل سے فون آیا جس میں اسے بتایا گیا کہ جس کمرے میں طالبہ کو شفٹ کرایا گیا ہے، وہ بند ہے۔ جب وہ پہنچا تو اس کے سامنے دروازہ ٹوٹا ہوا تھا جہاں وہ پنکھے سے لٹکی ہوئی پائی گئی۔ اس کے والد ارریہ میں الیکٹرک کی دکان چلاتے ہیں۔ پولیس نے طالبہ کے ہاسٹل پہنچنے کی سی سی ٹی وی فوٹیج بھی حاصل کر لی ہے، جس میں وہ بے چین دکھائی دے رہی ہے۔ہندوستھان سماچار

ہندوستان سماچار / Mohammad Afzal Hassan