ممبئی ، 22 مارچ (ہ س)۔ محکمہ موسمیات نے ممبئی اور تھانے کے لیے گرمی کے پیش نظر یلو الرٹ جاری کیا ہے، جہاں آئندہ دنوں میں زیادہ سے زیادہ درجہ حرارت 36 ڈگری سیلسیس تک پہنچنے کا امکان ظاہر کیا گیا ہے۔اطلاعات کے مطابق 22 مارچ 2026 کے بعد ایک ہفتے تک معمولی راحت ملنے کے باوجود شہر میں موسم نے دوبارہ شدت اختیار کر لی ہے۔ محکمہ موسمیات نے پیر اور منگل کے لیے گرم اور مرطوب موسم کی پیشگوئی کرتے ہوئے یلو الرٹ جاری کیا ہے، تاہم اس دوران لُو چلنے کی کوئی وارننگ نہیں دی گئی۔گزشتہ دنوں مہاراشٹر کے مختلف علاقوں میں تیز ہوائیں، آندھی، طوفان اور ژالہ باری کے باعث ممبئی اور اطراف کے علاقوں میں درجہ حرارت کچھ کم رہا تھا، جہاں دن کا درجہ حرارت 30 سے 31 ڈگری سیلسیس کے درمیان ریکارڈ کیا گیا، جبکہ اتوار کو زیادہ سے زیادہ درجہ حرارت تقریباً 34 ڈگری سیلسیس رہا۔ماہرین کے مطابق مارچ کے ابتدائی دنوں میں شہر میں مرطوب گرمی محسوس کی گئی تھی، تاہم شمالی علاقوں میں سرگرم مغربی نظام (ویسٹرن ڈسٹربنس) کی وجہ سے کچھ راحت ملی۔ اب اس نظام کے کمزور پڑنے کے بعد درجہ حرارت میں دوبارہ اضافہ متوقع ہے۔محکمہ موسمیات نے ممبئی کے ساتھ ساتھ کونکن خطے کے تھانے، رتناگیری اور رائے گڑھ اضلاع کے لیے بھی یلو الرٹ جاری کیا ہے۔ پانچ روزہ پیشگوئی کے مطابق منگل تک درجہ حرارت 36 ڈگری سیلسیس تک پہنچ سکتا ہے، جبکہ بدھ کو معمولی کمی کے بعد یہ 35 ڈگری کے آس پاس رہنے کا امکان ہے۔موسمی ماہرین نے درجہ حرارت میں اضافے کی وجہ سمندری ہواؤں اور مغربی ہواؤں کی آمد میں تاخیر کو قرار دیا ہے، جو عام طور پر دن کے وقت شہر کو ٹھنڈا رکھنے میں اہم کردار ادا کرتی ہیں۔محکمہ موسمیات نے واضح کیا ہے کہ موجودہ صورتحال کے باوجود کسی قسم کی ہیٹ ویو کی وارننگ جاری نہیں کی گئی ہے۔ ساحلی علاقوں میں ہیٹ ویو کی وارننگ اس وقت دی جاتی ہے جب درجہ حرارت 37 ڈگری سے زیادہ ہو یا مسلسل کئی دنوں تک معمول سے 4.5 سے 6.4 ڈگری زیادہ رہے۔اسی طرح شدید ہیٹ ویو اس وقت قرار دی جاتی ہے جب درجہ حرارت معمول سے 6.5 ڈگری یا اس سے زیادہ بڑھ جائے۔ گزشتہ ایک ماہ کے دوران شہر میں کم از کم تین بار لُو کی صورتحال دیکھی گئی، جن میں پہلی لہر 4 اور 5 مارچ، دوسری 9 اور 10 مارچ جبکہ تیسری 13 مارچ کو ریکارڈ کی گئی۔محکمہ موسمیات کے مطابق مارچ کا مہینہ عام طور پر درجہ حرارت میں اضافے کا ہوتا ہے کیونکہ یہ سردیوں سے گرمیوں کی جانب منتقلی کا دور ہوتا ہے۔ ریکارڈ کے مطابق ممبئی میں مارچ کا سب سے زیادہ درجہ حرارت 41.7 ڈگری سیلسیس سنہ 1956 میں درج کیا گیا تھا۔ہندوستھان سماچار

--------------------

ہندوستان سماچار / جاوید این اے