بھوپال، 22 مارچ (ہ س)۔ مدھیہ پردیش میں گزشتہ چار دنوں (تقریباً 98 گھنٹے) تک سرگرم رہے مضبوط ویدر سسٹم نے ریاست کے 45 اضلاع میں آندھی اور بارش کی۔ ان میں سے 17 اضلاع میں ژالہ باری بھی ہوئی، جس سے کسانوں کی فصلوں کو بھاری نقصان پہنچا ہے۔ اب یہ سسٹم آگے بڑھ چکا ہے، جس کے بعد ریاست میں موسم صاف رہنے اور درجہ حرارت بڑھنے کا امکان ہے۔ اگلے چار دنوں تک کہیں بھی آندھی یا بارش کی وارننگ نہیں ہے۔
محکمہ موسمیات کے مطابق، 26 مارچ سے ایک نیا ویسٹرن ڈسٹربنس سرگرم ہوگا، جس سے ریاست کے شمالی اور مغربی حصوں میں ہلکی بوندا باندی یا بادل چھانے کی صورتحال بن سکتی ہے۔ اس سے پہلے ہفتہ کو کچھ علاقوں میں بادل چھائے رہے، خاص طور پر بھوپال میں، جس سے دن کے درجہ حرارت میں گراوٹ درج کی گئی۔
درجہ حرارت کی بات کریں تو پچمڑھی سب سے ٹھنڈا رہا، جہاں زیادہ سے زیادہ درجہ حرارت 25.6 ڈگری سیلسیس درج ہوا۔ ریوا اور دتیا میں 28.2 ڈگری، نوگاوں اور ستنا میں 28.3 ڈگری، سیونی میں 28.4 ڈگری، ٹیکم گڑھ اور سیدھی میں 28.6 ڈگری، جبکہ دموہ اور امریا میں 29 ڈگری درج کیا گیا۔ شیوپور میں 29.4 ڈگری، منڈلا اور کھجوراہو میں 29.5 ڈگری سیلسیس رہا۔ بڑے شہروں میں بھوپال کا درجہ حرارت 29.4 ڈگری، جبل پور 29.5 ڈگری، اندور 30.6 ڈگری، گوالیار 28.4 ڈگری اور اجین 31.5 ڈگری سیلسیس ریکارڈ کیا گیا۔ تیز آندھی اور ژالہ باری کا سب سے زیادہ اثر کیلا، پپیتا اور گیہوں کی فصلوں پر پڑا ہے۔ دھار اور کھرگون سمیت کئی اضلاع میں نقصان زیادہ ہوا ہے۔
محکمہ موسمیات کے مطابق، گزشتہ چار دنوں میں اندور، دھار، کھرگون، بڑوانی، علی راج پور، جھابوا، برہان پور، کھنڈوا، بھوپال، راج گڑھ، ودیشا، رائسین، سیہور، نرمدا پورم، ہردہ، بیتول، گوالیار، مئو گنج، شیوپور، مرینا، دتیا، اشوک نگر، رتلام، اجین، آگر-مالوہ، شاجاپور، دیواس، ساگر، دموہ، پنا، چھترپور، کٹنی، امریا، مہر، ستنا، انوپ پور، جبل پور، نرسنگھ پور، چھندواڑہ، سیونی، پانڈھرنا اور منڈلا سمیت 45 اضلاع میں موسم کا اثر دیکھنے کو ملا۔ وہیں علی راج پور، بڑوانی، ودیشا، بیتول، جھابوا، کھنڈوا، آگر-مالوہ، چھندواڑہ، جبل پور، سیونی، چھترپور، شیوپوری، رائسین، ساگر، دموہ، پنا اور منڈلا اضلاع میں اولے گرے۔
آگے کے موسم کے بارے میں محکمہ نے خبردار کیا ہے کہ اپریل اور مئی میں اس بار شدید گرمی پڑ سکتی ہے۔ گوالیار، چنبل، جبل پور، ریوا، شہڈول اور ساگر ڈویژن میں درجہ حرارت 45 ڈگری سیلسیس سے اوپر جا سکتا ہے، جبکہ بھوپال، اندور، اجین اور نرمدا پورم ڈویژن میں بھی تیز گرمی کا اثر رہے گا۔
ہندوستھان سماچار
---------------
ہندوستان سماچار / انظر حسن
