جموں, 22 مارچ (ہ س)۔جموں و کشمیر کانگریس کے ایک اعلیٰ سطحی وفد نے لیفٹیننٹ گورنر منوج سنہا سے راج بھون جموں میں ملاقات کی اور ریاستی درجے کی بحالی سمیت متعدد اہم عوامی مسائل اٹھائے۔وفد کی قیادت کانگریس کے ورکنگ صدر رامن بھلہ کر رہے تھے۔ ملاقات کے دوران وفد نے ریاستی درجے کی جلد بحالی، ایل پی جی کی قلت، اور مختلف طبقات کو درپیش مسائل پر تفصیلی تبادلہ خیال کیا۔
کانگریس رہنماؤں نے 1947، 1965 اور 1971 کے مہاجرین کے لیے جامع بازآبادکاری پیکیج پر عمل درآمد کا مطالبہ کیا اور انہیں درج فہرست قبائل (ایس ٹی) کا درجہ دینے کی اپیل کی۔ اس موقع پر 2014 میں کانگریس-این سی حکومت کی جانب سے سابق وزیر اعظم منموہن سنگھ کی ہدایت پر تجویز کردہ پیکیج کا حوالہ دیتے ہوئے کہا گیا کہ اس میں فی خاندان 30 لاکھ روپے کی سفارش کی گئی تھی، تاہم اب تک صرف 5.5 لاکھ روپے ہی منظور ہوئے ہیں اور وہ بھی تمام مستحقین تک نہیں پہنچ سکے۔
وفد نے سیاحوں اور یاتریوں کی بڑھتی ہوئی تعداد کے پیش نظر خطے کے لیے ایل پی جی کوٹہ بڑھانے کا مطالبہ بھی کیا۔ اس کے علاوہ جموں میں بڑھتے جرائم اور منشیات کے استعمال پر تشویش ظاہر کرتے ہوئے سیکورٹی فورسز کی بھرتی اور تعیناتی میں اضافہ کرنے کی ضرورت پر زور دیا گیا۔
کانگریس رہنماؤں نے سیلاب متاثرین کی بازآبادکاری، شہری ترقی کے لیے فنڈز کی فراہمی، کشمیری مہاجرین کی فلاح و بہبود، اور سرکاری محکموں میں کام کرنے والے ڈیلی ویجرز، عارضی اور کنٹریکچول ملازمین کو مستقل کرنے کے لیے خصوصی پیکیج دینے کا بھی مطالبہ کیا۔
ہندوستھان سماچار
---------------
ہندوستان سماچار / محمد اصغر
