مغربی بنگال اسمبلی انتخابات : دو مرحلوں میں 2,400 مرکزی فورس کمپنیوں کی تعیناتی، کمیشن کی تیاریاں تیز
کولکاتا، 21 مارچ (ہ س)۔ مغربی بنگال میں آئندہ اسمبلی انتخابات کے لیے سیکورٹی انتظامات کے حوالے سے الیکشن کمیشن نے بڑے پیمانے پر مرکزی فورسز کی تعیناتی کا فیصلہ کیا ہے۔ ریاست میں انتخابات کے دونوں مرحلوں کے لیے سینٹرل آرمڈ پولیس فورس، انڈیا ریزرو بٹالین اور دیگر ریاستوں کی مسلح پولیس کی کل 2,400 کمپنیاں تعینات کی جائیں گی۔
الیکشن کمیشن کی جانب سے جمعہ کی رات جاری کردہ نوٹیفکیشن کے مطابق یہ معلومات دی گئی ہے۔ پہلے مرحلے کی پولنگ 23 اپریل اور دوسرے مرحلے کی پولنگ 29 اپریل کو ہوگی۔ اس سے کافی پہلے مرکزی فورسز کی تعیناتی کر دی جائے گی۔ نوٹیفکیشن میں یہ بھی بتایا گیا ہے کہ خصوصی گہری نظرثانی مہم کے دوران ’لاجیکل بے ضابطگی‘ کے زمرے میں عدالتی جانچ کے لیے بھیجے گئے معاملات کی پہلی ضمنی فہرست اب 23 مارچ کو شائع کی جائے گی۔ پہلے اسے 20 مارچ کو جاری کیا جانا تھا۔
انتخابات سے پہلے ہی پیشگی تعیناتی کے تحت سینٹرل آرمڈ پولیس فورس کی 480 کمپنیاں مغربی بنگال پہنچ چکی ہیں۔ نوٹیفکیشن کے مطابق دوسرے مرحلے کی پولنگ ختم ہونے کے بعد 200 کمپنیاں الیکٹرانک ووٹنگ مشین (ای وی ایم)، اسٹرانگ روم اور ووٹ شماری مراکز کی سیکورٹی کے لیے ووٹوں کی گنتی مکمل ہونے تک ریاست میں تعینات رہیں گی۔
اس کے علاوہ امن و امان برقرار رکھنے اور انتخابات کے بعد ممکنہ تشدد کو روکنے کے لیے 500 کمپنیاں اگلے حکم تک ریاست میں ہی رہیں گی۔ سال 2021 کے اسمبلی انتخابات اور 2024 کے لوک سبھا انتخابات کے بعد ہونے والے تشدد کو مدنظر رکھتے ہوئے یہ فیصلہ لیا گیا ہے۔
ووٹنگ کا عمل مکمل ہونے کے بعد مرکزی فورسز، انڈیا ریزرو بٹالین اور دیگر ریاستوں کی مسلح پولیس کی بقیہ 1,700 کمپنیوں کو واپس بلا لیا جائے گا۔
الیکشن کمیشن نے ریاستی حکومت کو ہدایت دی ہے کہ وہ مرکزی فورسز، انڈیا ریزرو بٹالین، ریاستی مسلح پولیس اور چیف فورس کوآرڈینیٹر کے ساتھ مل کر تعیناتی کا تفصیلی منصوبہ تیار کرے۔
مرکزی فورسز کی نقل و حرکت اور تعیناتی کا تال میل سینٹرل ریزرو پولیس فورس (سی آر پی ایف) کے ذریعے کیا جائے گا۔ سی آر پی ایف مغربی بنگال سیکٹر کے انسپکٹر جنرل شلبھ ماتھر کو انتخابات کے لیے اسٹیٹ فورس کوآرڈینیٹر نامزد کیا گیا ہے۔
نوٹیفکیشن میں ریاستی حکومت سے کہا گیا ہے کہ فورسز کی ضرورت کے مطابق ٹرانسپورٹ، لاجسٹک، رہائش اور دیگر ضروری انتظامات کو یقینی بنایا جائے۔
ہندوستھان سماچار
---------------
ہندوستان سماچار / انظر حسن
