نئی دہلی، 2 مارچ (ہ س)۔

اسرائیل، امریکہ اور ایران کے درمیان بڑھتی ہوئی کشیدگی اب ہندوستانی کھلاڑیوں کو بھی متاثر کر رہی ہے۔ سولہ ہندوستانی پہلوان جنہوں نے یونائیٹڈ ورلڈ ریسلنگ رینکنگ سیریز میں شرکت کے لیے سفر کیا تھا البانیہ کے دارالحکومت ترانہ میں پھنسے ہوئے ہیں۔ مشرق وسطیٰ کے بیشتر حصوں میں فضائی حدود کی بندش اور پروازوں کی منسوخی کی وجہ سے ان کی واپسی میں رکاوٹ پیدا ہوئی ہے۔

مغربی ایشیا میں بڑھتی ہوئی فوجی کشیدگی کے باعث کئی ممالک نے اپنے ہوائی اڈے بند کر دیے ہیں اور پروازوں پر پابندیاں عائد کر دی ہیں۔ ہندوستانی دستے کو دبئی کے راستے واپس آنا تھا لیکن دبئی میں ہونے والے حملوں کے بعد کنیکٹنگ فلائٹ منسوخ کر دی گئی جس سے پوری ٹیم کو ترانہ میں ہی رہنا پڑا۔

ویمنز ٹیم کی کوچ منجیت رانی نے ایک ویڈیو پیغام میں کہا کہ ہم سینئر رینکنگ سیریز کے لیے ترانہ آئے تھے لیکن دبئی میں ہونے والے حملوں کے باعث ہماری کنیکٹنگ فلائٹ منسوخ کر دی گئی، ہم اس وقت ایئرپورٹ کے قریب ایک ہوٹل میں قیام پذیر ہیں اور کسی قسم کی پریشانی کا سامنا نہیں کر رہے ہیں۔ ہم بھارتی حکومت اور ریسلنگ فیڈریشن آف انڈیا کے تعاون پر شکریہ ادا کرتے ہیں۔ خواتین کے 57 کلوگرام زمرے میں چاندی کا تمغہ جیتنے والی نیہا سنگوان کے والد نے کہا کہ ٹیم کو آج دہلی پہنچنا تھا، لیکن دبئی کے راستے پرواز منسوخ کر دی گئی۔ اب متبادل راستے سے واپسی کی کوششیں جاری ہیں۔

خواتین کے چیف کوچ وریندر دہیا نے کہا کہ ریسلنگ فیڈریشن آف انڈیا کھلاڑیوں کی بحفاظت واپسی کو یقینی بنانے کے لیے ہر ممکن کوشش کر رہی ہے۔ انہوں نے یقین ظاہر کیا کہ ٹیم کو جلد ہندوستان واپس لایا جائے گا۔

اسی طرح، ہندوستانی مردوں کی باسکٹ بال ٹیم قطر کے دارالحکومت دوحہ میں پھنسی ہوئی ہے، ایف آئی بی اے ورلڈ کپ 2027 کوالیفائر میں لبنان کے خلاف میچ ملتوی ہونے کے بعد ان کی واپسی کا انتظار کر رہی ہے۔ دو مرتبہ کی اولمپک تمغہ جیتنے والی پی وی سندھو اور ان کے کوچ اروانشاہ آدی پراتما متحدہ عرب امارات کے دبئی انٹرنیشنل ایئرپورٹ پر پھنسے ہوئے ہیں۔

جب کہ تمام ہندوستانی کھلاڑی محفوظ بتائے جاتے ہیں، مشرق وسطیٰ میں جاری کشیدگی نے ان کی واپسی کو غیر یقینی بنا دیا ہے۔

ہندوستھان سماچار

ہندوستان سماچار / عطاءاللہ