کونو میں چیتوں کی آباد کاری حیاتیاتی تنوع کے تحفظ کی سمت میں بڑا قدم: بھوپیندر یادو

۔ بوٹسوانا سے کونو نیشنل پارک پہنچے 9 چیتے، مرکزی وزیر جنگلات نے تین چیتوں کو باڑے میں چھوڑا

بھوپال، 27 فروری (ہ س)۔ مرکزی وزیر برائے جنگلات و ماحولیات بھوپیندر یادو نے کہا کہ بوٹسوانا سے کونو نیشنل پارک میں لائے گئے چیتوں سے بوٹسوانا اور ہندوستان کے درمیان حیاتیاتی تنوع کے تحفظ کی ایک تاریخی شراکت داری شروع ہوئی ہے۔ یہ چیتوں کی آباد کاری کی سمت میں بڑا قدم ہے۔ مرکزی وزیر نے ہفتہ کو افریقی ملک بوٹسوانا سے لائے گئے چیتوں کو مدھیہ پردیش کے شیوپور ضلع میں واقع کونو نیشنل پارک میں چھوڑنے کے بعد یہ بات کہی۔

انہوں نے کہا کہ وزیر اعظم نریندر مودی کی خصوصی پہل اور کوششوں سے ہندوستان میں چیتوں کی منتقلی کا منصوبہ پوری طرح سے کامیاب رہا ہے۔ حیاتیاتی تنوع کے تحفظ کی سمت میں کئی ممالک ایک ساتھ آئے ہیں۔ انہوں نے کہا کہ ہندوستان میں چیتا پروجیکٹ کو ساڑھے تین سال کا عرصہ ہو گیا ہے۔ کونو نیشنل پارک میں چیتوں کا کنبہ مسلسل بڑھ رہا ہے، اس وقت ہندوستان میں چیتوں کی تعداد 48 ہو گئی ہے، جن میں 45 کونو نیشنل پارک اور تین گاندھی ساگر سینکچری میں ہیں۔ ہندوستان کی کوششوں سے دنیا میں حیاتیاتی تنوع کے تحفظ کے لیے کام کیا جا رہا ہے اور 97 ممالک اس پلیٹ فارم کے رکن بن گئے ہیں۔

مرکزی وزیر بھوپیندر یادو نے کہا کہ ہندوستان میں چیتوں کی آباد کاری کے لیے تین سال قبل شروع ہوئے چیتا پروجیکٹ کے تحت بوٹسوانا سے لائے گئے 9 چیتے ہفتہ کی صبح تقریباً 9.30 بجے کونو نیشنل پارک پہنچے۔ فضائیہ کے تین ہیلی کاپٹروں سے گوالیار ایئرپورٹ سے ان چیتوں کو کونو نیشنل پارک میں ایئر لفٹ کیا گیا۔ ان چیتوں میں 6 مادہ اور 3 نر چیتے شامل ہیں۔

اس موقع پر بوٹسوانا سے آئے 9 چیتوں میں سے تین چیتوں کو علامتی طور پر قرنطینہ کے لیے بنائے گئے باڑوں میں چھوڑا گیا۔ اس کے بعد بوٹسوانا سے آئے چیتا ماہرین کی ٹیم سے ملاقات کر کے تبادلہ خیال کیا، ساتھ ہی انہیں کونو نیشنل پارک کی جانب سے یادگاری نشانات پیش کیے گئے۔

اس موقع پر ریاست کے وزیر برائے نئی اور قابل تجدید توانائی راکیش شکلا، علاقائی رکن پارلیمنٹ شیو منگل سنگھ تومر، سہریا ڈیولپمنٹ اتھارٹی کے چیئرمین اور کابینہ وزیر کا درجہ حاصل ترسن پال بریا، سابق وزیر رام نواس راوت، عوامی نمائندے، ڈی جی وائلڈ لائف حکومت ہند سشیل کمار اوستھی، محکمہ جنگلات کے اے سی ایس سندیپ یادو، پرنسپل چیف کنزرویٹر آف فاریسٹ اینڈ ہیڈ آف فاریسٹ فورس وی این امباڈے، چمبل کمشنر سریش کمار سمیت اعلیٰ افسران موجود تھے۔

ہندوستھان سماچار

---------------

ہندوستان سماچار / انظر حسن