نئی دہلی، 28 فروری (ہ س)۔ وزیر اعظم نریندر مودی نے ہفتہ کو اجمیر سے 14 سال کی عمر کی لڑکیوں کے لیے ملک گیر ہیومن پیپیلوما وائرس (ایچ پی وی ) ویکسینیشن پروگرام کا آغاز کیا۔ مرکزی وزیر صحت جے پی نڈا اور کئی افسران ویڈیو کانفرنسنگ کے ذریعے اس موقع پر شامل ہوئے۔ اس مہم کے آغاز کے ساتھ ہی تمام ریاستوں اور مرکز کے زیر انتظام علاقوں میں بھی ایچ پی ویٹیکہ کاری شروع کر دی گئی۔ یہ مہم ہندوستان میں سروائیکل کینسر سے لڑنے اور ناری شکتی کو مضبوط کرنے کی سمت ایک اہم قدم ہے۔ مرکزی وزیر صحت نڈا نے ہفتہ کو کہا کہ وزیر اعظم نریندر مودی کے ذریعہ قومی ایچ پی وی ٹیکہ کاری مہم کا آغاز ہماری بیٹیوں کی صحت کی حفاظت کی طرف ایک تاریخی قدم ہے۔

یہ پہل احتیاطی صحت کی دیکھ بھال اور ایسے مستقبل کے لیے وزیر اعظم کی گہری وابستگی کی عکاسی کرتی ہے جہاں کوئی بھی خاندانٹیکے سے روکی جا سکنے والی بیماری کے وجہ سے اپنے کسی عزیز کو نہ کھوئے۔

انہوں نے کہا کہ اس تاریخی مہم کے تحت ،14 سال کی تمام اہل لڑکیوں کو اب سرکاری مراکز صحت کے ذریعے ایچ پی وی کا ایک ہی خوراک والے ٹیکے تک مفت رسائی حاصل ہوگی۔ سروائیکل کینسر نے بے شمار خاندانوں کو خاموشی سے متاثر کیا ہے، لیکن آج ہم ایک مضبوط پیغام دے رہے ہیں کہ تحفظ، آگاہی اور ویکسینیشن تک رسائی ملک کے کونے کونے تک پہنچے گی۔جب ہم اپنی بیٹیوں کی حفاظت کرتے ہیں تو ہم اپنے ملک کو مضبوط بناتے ہیں۔

ٹیکہ کاری کہاں ہو گی؟

ایچ پی وی ٹیکہ کاری ملک بھر میں مختلف سرکاری صحت کے اداروں ، بشمول آیوشمان آروگیہ مندر، کمیونٹی ہیلتھ سینٹر، ڈسٹرکٹ اسپتال، گورنمنٹ میڈیکل کالجمیں دستیاب ہوگی۔

کون اہل ہو گا؟

یہ مہم بنیادی طور پر 14 سال سے زیادہ عمر کی لڑکیوں کے لیے ہے۔ اسکول اور مقامی محکمہ صحت اہل لڑکیوں کی فہرست تیار کریں گے۔ جو لڑکیاں اسکول میں نہیں ہیں، وہ قریبی سرکاری صحت مرکز میں جاکر اپنی رجسٹریشن کروا سکتی ہیں۔ ویکسینیشن کے لیے والدین کی رضامندی درکار ہوگی۔ ویکسینیشن کے بعد لڑکیوں کو صحت کے مراکز میں 15 سے 30 منٹ تک رکھا جائے گا۔

قابل ذکر ہے کہ ملک میں ہر سال ہزاروں خواتین سروائیکل کینسر سے متاثر ہوتی ہیں۔ اس بیماری کی سب سے بڑی وجہ ہیومن پیپیلوما وائرس (ایچ پی وی ) ہے، جو اکثر علامات ظاہر کیے بغیر جسم میں داخل ہو جاتا ہے۔ اب اس وائرس سے تحفظ ممکن ہے۔ ورلڈ ہیلتھ آرگنائزیشن نے 2022 میں سفارش کی کہ ایچ پی وی ویکسین کا زیادہ سے زیادہ فائدہ اس وقت حاصل ہوتا ہے جب چھوٹی عمر میں لگائی جائے۔ 14 سال کی عمر تک، جسم کا مدافعتی نظام ایک مضبوط ردعمل پیدا کرتا ہے، جو طویل مدتی تحفظ فراہم کرتا ہے۔ بہت سے معاملات میں، یہاں تک کہ ایک خوراک بھی مناسب تحفظ فراہم کر سکتی ہے، اور دو خوراکیں اتنی ہی موثر پائی گئی ہیں۔

ہندوستھان سماچار

ہندوستان سماچار / محمد شہزاد