رانچی، 28 فروری (ہ س)۔ جھارکھنڈ کے دارالحکومت رانچی میں بھارتیہ جنتا پارٹی (بی جے پی) کی حمایت یافتہ امیدوار روشنی کھلکھو میئر بن گئی ہیں۔ انہوں نے جمعہ کو کانگریس کی حمایت یافتہ رما کھلکھو کو 14,363 ووٹوں سے ہرایا۔ روشنی کو 1,57,669 ووٹ ملے، جبکہ رما کو 1,43,306 ووٹ ملے۔ پانچ راونڈ میں ہوئی ووٹوں کی گنتی کا نتیجہ رات 12 بجے اعلان کیا گیا۔ روشنی نے پہلے راونڈ سے ہی برتری حاصل کی اور یہ آخر تک برقرار رہی۔ میئر کے عہدے کے لیے 11 امیدوار میدان میں تھے، لیکن اصل مقابلہ روشنی اور رما کے درمیان رہا۔ دیگر نو امیدواروں کی ضمانت ضبط ہو گئی ہے۔
روشنی کھلکھو نے جیت کے بعد کہا کہ یہ عوام کی جیت ہے۔ گزشتہ تین سال سے انتخابات نہیں ہونے کی وجہ سے لوگ مایوس تھے اور افسر شاہی حاوی تھی۔ ان کی بات سننے والا کوئی نہیں تھا۔ اس لیے یہ جیت عام لوگوں کی جیت ہے۔ اب عوام کو ایسی پریشانیوں کا سامنا نہیں کرنا پڑے گا۔ عوام کے مسائل کا براہ راست حل کیسے ہو، یہ ہمارا پہلا کام ہوگا۔ اس کے لیے پورا روڈ میپ تیار ہے۔ جلد ہی یہ عملی جامہ پہنتا ہوانظر آئے گا۔
ہزاری باغ میونسپل کارپوریشن کے نئے میئر اروند کمار رانا منتخب ہوئے ہیں۔ اروند رانا اکھل بھارتیہ ودیارتھی پریشد کے کارکن اور صحافی بھی رہے ہیں۔ پہلی بار ہوئے مانگو میونسپل کارپوریشن انتخابات میں میئر کے عہدے کے لیے سابق وزیر صحت بنّا گپتا کی اہلیہ سدھا گپتا نے بی جے پی کی حمایت یافتہ سندھیا سنگھ کو ہرایا۔ آدتیہ پور میونسپل کارپوریشن میں بی جے پی کی حمایت یافتہ سنجے سردار جیتے۔ دیوگھر میونسپل کارپوریشن انتخابات کے نئے میئر جے ایم ایم (جھارکھنڈ مکتی مورچہ) کے حمایت یافتہ امیدوار روی راوت منتخب ہوئے۔ دھنباد میں سنجیو سنگھ آگے چل رہے ہیں۔ وہیں، میدنی نگر میں بی جے پی کی حمایت یافتہ ارونا شنکر نے سخت مقابلے میں کانگریس کی حمایت یافتہ نمرتا ترپاٹھی کو 3122 ووٹوں سے ہرایا۔ چاس میں بھولو پاسوان آگے چل رہے ہیں۔ وہیں، نگر پنچایت میں بی جے پی کی حمایت یافتہ 8 امیدواروں نے جیت درج کی ہے۔ بغیر حمایت والے امیدواروں نے میونسپل کارپوریشن کے ساتھ ساتھ نگر پریشد میں بھی اچھی کارکردگی کا مظاہرہ کیا ہے۔ 23 فروری کو جھارکھنڈ کے 48 بلدیاتی اداروں میں انتخابات ہوئے تھے۔
وہیں، بنڈو نگر پنچایت کے صدر کے عہدے کے لیے ہوئے انتخابات میں جیتیندر اوراؤں نے شاندار جیت درج کی ہے۔ سرکاری نتائج کے مطابق، انہیں کل 4007 ووٹ ملے۔ ان کے قریبی حریف راجیش اوراؤں کو 3198 ووٹ ملے۔ اس طرح جیتیندر اوراؤں نے 809 ووٹوں کے فرق سے جیت حاصل کی۔ نگر پریشد کے فاتح امیدواروں میں پاکوڑ سے شبری پال، گوڈا سے سشیل رمانی، گملا سے شکنتلا اوراؤں، لوہردگا سے انل اوراؤں، مہجام سے جے شری دیوی، جگسلائی سے نوشین خان، چائیباسا سے نتن پرکاش، گڑھوا سے آشیش سونی، بشراپمور سے گیتا دیوی، چکردھر پور سے شنی اوراؤں، چترا سے عطاء الرحمن، رام گڑھ سے کسم لتا دیوی، پھسرو سے نرملا دیوی، صاحب گنج سے رام ناتھ پاسوان، چرکنڈا سے سنیتا دیوی، جھمری تلیا سے رمیش ہرش دھر، کپالی سے پرویز عالم شامل ہیں۔
نگر پنچایت سے فاتح امیدواروں میں بنڈو سے جیتیندر اوراؤں، ڈومچانچ سے امیش ورما، چاکولیا سے سومواری سورین، جامتاڑا سے آشا گپتا، مہاگاما سے پربودھ سورین، لاتیہار سے مہیش سنگھ، باسوکی ناتھ سے بینا دیوی، کھونٹی سے رانی ٹوٹی، چھترپور سے اروند گپتا، بنشیدھر نگر سے سادھنا دیوی، مجھیاؤں سے سمترا دیوی، ہریہار گنج سے شیلا چودھری، حسین آباد سے اجے بھارتی، دھنوار سے ونئے سنتھالیا، بڑکی سریا سے شوبھا دیوی، راج محل سے قطب الدین شیخ، برہروا سے ارپتا داس، کوڈرما سے ساجد حسین اور سرائے کیلا سے منوج چودھری شامل ہیں۔
ہندوستھان سماچار
---------------
ہندوستان سماچار / انظر حسن
